MIRI: Pakej Kunterik Kereja (WPC) 11 ungkup Jalai Besai Pan Borneo (LPB) ti mungkur Sungai Tangap-Simpang Pujut Link disadang tembu berenggat nyentuk taun 2026.
Menteri Kereja Raya, Datuk Seri Alaexander Nanta Linggi madah, sebuah jalai lambung 400 meter pemanjai deka digaga berebak ari penanggul tanah dia.
“Peratus pemansang penuh pakej WPC 11 tu iya nya 89 peratus enda nyengkaum pengawa ngaga jalai lambung enggau pengawa nginsitka batang paip ai beresi 4.5 kilometer pemanjai,” ku iya.
Iya madah, pengawa ngaga jalai lambung nya patut digaga laban maya nimbuk tanah dia, tanah timbuk nya nurun 0.5 meter.
“Raban Projek Pan Borneo merambu struktur jalai lambung digaga ba jalai ti napi penanggul tanah nurun.
“Langkar tengkebang jalai lambung tu udah tembu digaga lalu pengawa ngaga jalai lambung tu disadang deka berengkah digaga ba suku ketiga taun 2023 sereta disadang tembu ba taun 2025,” ku iya.
Iya madah, pengawa ngaga jalai lambung nya enda ngeruga pengelanchar trafik dia laban penguna agi ulih ngena jalai ti endang udah bisi ba sepiak nya.
Iya bela nemuai ngagai CG29+000 iya nya sebengkah Jalai Lambung Simpang Bekenu, Seksyen Lambir ti benung digaga.
Iya ngenukuka pengawa ngaga penuh LPB udah manggai 94 peratus.
