Jalai tebing pantai ulih matak penatai temuai

BINTULU: Perintah Sarawak chakah ngaga jalai tebing pantai ari Sematan ngagai Miri penyauh 900 kilometer enggau manah ngambi ulih narit penatai temuai luar ke nengeri tu.

Sapit Kepala Menteri Tan Sri Datuk Amar James Jemut Masing madahka pengawa ngaga jalai tebing pantai tu nentuka pejalai ba jalai tebing pantai enda ngena servis feri ari Sematan ngagai Miri.

Pia mega ku iya, empat ari jematan ti betengahka jalai tebing pantai ti disemaya deka dipelanja Perintah Besai udah dikinsil tauka ditangguh sida.

Ku Masing, empat jematan tu iya nya Jematan Rambungan, Batang Lupar, Batang Igan enggau Jematan Kemena.

Nambahka nya ku Masing, Perintah Sarawak sedarka perambu ngaga jalai tebing pantai enda dipejalai penuh nyema empat jematan tu enda digaga.

Tan Sri Datuk Amar James Jemut Masing

“Nya alai, Kepala Menteri Datuk Patinggi Abang Johari Tun Openg nampung projek tu ngambika dipejalai baru.

“Iya (Kepala Menteri) ngerah opis menteri neruska perambu empat buah jematan tu dipelanja Perintah Sarawak lalu ngarapka Perintah Besai deka mulaika belanja tu baru,” ku Masing madah.

Iya mansutka jaku tu beserimbai enggau Pengawa Nasih Tanah Jematan Kuala Kemena, Jepak Bintulu, tadi.

Jematan Jepak Kemena ngembuan empat jalai lalu digaga titi ba atas simpang   Jalan Tun Ahmad Zaidi, Jalan Tun Razak, Jalan  Abang Jalau deka diperambu tembu ba taun 2023.

Semua jematan tu ila deka digaga baka Jematan Golden Gate, San Fransisco California enggau deka diberi lampu dikena matak penatai bala temuai.

Nambahka nya, pengawa ngaga jematan tu deka ngemandakka pejalai ari mengeri Bintulu ngagai Padang Bilun Bintulu semina 14.6 km aja.

Pia mega, jematan tu deka nyambung sitak di baruh SCORE baka palan industri Samalaju enggau ngemuntangka penguna ngagai palan endur gawa.