Jam ngundi, anang mudah dibeli enggau wang

SIBU: Pengundi ba sitak Dudong ditu dilalau ngambi enda mudah tekuing penemu laban ‘politik wang’ ba undi sida maya Pengawa Bepilih Nengeri Ke-12 (PRN12) ke deka datai.

Presiden Parti Demokratik Progresif (PDP) Datuk Seri Tiong King Sing madah, bayar nya semina deka meri penguntung enda lama ngagai bala pengundi.

Taja pia ku iya, pengundi meseti lurus ati lebuh ngundi ngambi mantu chalun dipilih sida menang ba pengawa bepilih ke deka datai.

“Kebuah pia, lebuh chalun ti menang ba pengawa bepilih deka ngemuntangka chalun dipilih sida bejalaika pemansang timpuh panjai ba kandang menua tu.

“Enti sema chalun meri RM350, RM500 tauka RM1,000 ngagai pengundi dikena meli undi sida, iya nya pembula enggau deka ngeruga pemansang rayat dudi hari,” ku iya.

Tiong mansutka jaku nya ba Pengerami Ketuai Begulai Enggau Rayat ba Rumah Nyundang Jalin, Jalai KJD, ditu apin lama ke udah.

Tiong ti mega Kaban Parlimen Bintulu madah, pengundi patut ngubah ulah enti sida amat keran dekaka siku ketuai ke ulih mai pemansang ba menua sida empu.

Berebak enggau nya, iya mega minta kaunsilor ke baru dichiri semampai ngabas ngambi ulih matau sereta beratika penanggul enggau peminta rayat kelimpah bejalaika tanggungpengawa ke udah dilempai ngagai sida.

Berindik ari nya ku iya, semina rayat ba menua tu aja ke ulih megai menua Sarawak.

Iya mega nyemetak madah, orang luar nadai hak megai tauka nguasa Sarawak kelimpah ari rayat ditu empu.

Nya kebuah ku iya, Perintah Sarawak dipegai GPS enggau naka ulih nyaga enggau ngetanka menua tu ari piak luar ke ngulih mambarka penyerakup enggau kaul rayat Sarawak.

Tiong mega minta rayat ba sitak Dudong pintar ngaga pemutus entara ubah ke udah dipejalai Perintah GPS enggau pekara ke deka dibantaika Perintah Pakatan Harapan (PH).

Ba pekara nya, iya madahka rayat patut pintar meratika semua inisiatif enggau pengeran Perintah Sarawak kelebih agi GPS lebuh megai enggau ngemansnagka menua tu sereta enda alah ajum jaku orang ke enda patut nya.

Nya alai, iya mai semua rayat ba sitak Dudong ngambi ngetan enggau ngenegap penyerakup, pengelantang enggau kaul ke manah entara pupu bansa ke dikembuan ditu.

Kaul ke manah tu mih chara kitai ngelama tu ke alai ketuai suah ngabasa ngambi ngelala penusah enggau mutarka penusah sida tu kelai ketuai GPS endang siku ketuai ke kemerah enggau rayat.

Ba pengerami nya, Tiong bisi ngagihka geran agih belanja penyampau RM30,000 di baruh Projek Transfomasyen Menua Pesisir (RTP) ba taun 2020 dikena nyeleti Rumah Nyudang kelimph geran penyampau RM5,000 ngagai Biro Indu Rumah Nyudang.

Sama datai Kaban Kunsil Nengeri (Adun) Meluan Rolland Duat Jubin, Chairman PDP Dudong Kaunsilor Teo Boon Siew, Tukang Wang Besai PDP Kaunsilor Ting Huat Sing sereta raban ari komponen Gempung Parti Sarawak (GPS) ke bukai.

Suara Sarawak