LONDON: Bulgari empai lama dikemegau mensia mayuh ba serata dunya lebuh mantaika koleksyen jam baru pemadu nipis ba dunya urung 1.80 milimeter (mm) penebal.
Taja pia, Bulgari nerima semekih ari chap jam Richard Mille ti bekerejasama enggau Ferrari ngasilka jam ti nipis agi.
Jam RM UP-01 nya 0.05mm nipis agi ari jam Bulgari, Octo Finissimo Ultra sereta nyadi jam pemadu nipis ba dunya.
“Nya alai, penebal jam RM UP-01 Ferrari tu iya nya 1.75mm lalu tu pemujur ti nyelai kelimpah mandangka pelasar baru ba pengawa ngaga jam,” ku Richard Mille nengah website sida.
Seraris enggau teknologi dikena, siti jam nya dijual enggau rega AS$1.8 juta (RM7.9 juta) lalu jam Bulgari berega AS$400,760 (RM1.8 juta).
Raban Richard Mille madah, jam nya digaga enggau diuji ba pengelama 6,000 jam sereta digaga ari 90 peratus titanium gred pemadu manah enggau enam peratus aja ari aluminium kelimpah ngeluar 150 iti aja.
