SARATOK: Serakup Pengajar Sarawak (STU) minta Opis Pelajar Malaysia (KPM) nyukung peminta lalu bebasaka maya jam ti patut dikena bala pengajar sekula belelak pengudah abis timpuh ngereja pengawa ba sekula.
Presiden iya, Adam Prakash Abdullah madah, tu nyengkaum nganjung peminta ngagai KPM ngambi sida ngeluarka surat tesau nuju prinsipal enggau kepala pengajar ba sekula ti madahka sida enda tau sesekali meri pangku pengawa ngagai siku-siku pengajar tauka staf baruh sida ngelui ari jam maya gawa tauka maya pemisi sekula tauka ba ujung minggu.
“Kami (STU) udah selubang penemu lalu minta KPM nyukung langgur diperambu kami dalam aum tu tadi ti dekaka awak tauka timpuh jam endur bala pengajar patut belelak sereta begulai enggau diri sebilik diberi perati enggau basa.
“Tu mega nyengkaum ngaga peminta ngagai KPM ngambi ngeluarka surat tesau nuju bala prinsipal enggau kepala pengajar ngambi sida enda peneka ati meri pangku pengawa ngagai pengajar tauka staf sekula.
“Lebih agi enti sesebengkah pengawa nya deka dikereja ba luar tauka ngelui ari timpuh maya jam ti patut alai sida gawa,” ku iya.
Adam madah munyi nya ba sebengkah penerang berita iya pengudah tembu Aum Exco Kedua Serakup Pengajar Sarawak (STU) diatur ba sebengkah hotel tebilang di Sibu apin lama ke udah.
“Pengajar ba sekula sigi orang ti chukup bepenau lalu enti diberi kereban enggau sukung ti betul, sida mega ulih mansang ke mua.
“Taja pia, barang orang ke bukai sida mega begunaka jam dikena belelak sereta awak begulai enggau diri sebilik pengudah abis timpuh jam maya gawa.
“Nya alai, aku ngarapka pekara tu diberi perati lengkas ulih KPM ngambi enda pulaika penanggul ngagai bala pengajar enggau staf sekula ke bukai jemah,” ku iya.
Ungkup penemu, ba aum ti sama Serakup Pengajar Sarawak (STU) mega bisi mantaika tiga iti agi peminta ngagai Opis Pelajar Malaysia (KPM) merambu ngagai Opis Pengerai Malaysia (KKM) ungkup nyendiaka Staf Perubat dikena matau lalu nyaga nembiak kena rampit Covid-19 iyaka diasuh kuarantin ba sekula, minta kemisi ungkup Hari Deepavali dipejalaika ngagai sekula ba selampur menua enggau kuasa penuh diberi ngagai sekula ungkup ngereja pengawa bekaul enggau data ari Opis Pelajar Pelilih (PPD).
Sama bisi datai ngulu aum tu iya nya empat iku Mandal Presiden STU, pengajar Kullin Djayang, Madeline Kho, Goh wei mei enggau Soo siew hong, Sekretari Besai, Chin Fui San, Tukang Wang, Chan Chiew Sze enggau kaban ke bukai.
