ARTIKEL

BERI PERATI… Gerah dikeluarka KKM.

Jampat beperesa enti diketup, dikeramak ukui enggau mayau

Facebook
Twitter
LinkedIn
WhatsApp
Telegram

KUCHING: Peranak ke diau ba 15 buah genturung pendiau ti nemu diri bisi diketup enggau dikeramak mayau tauka ukui ari November 2023 nyentuk diatu lalu nadai kala berubat dipinta datai lengkas ngagai klinik pengerai perintah.

Opis Pengerai Bagi Menua Kuching dalam siti penerang media madah, pekara nya beguna endar ngambi sida ti kena ketup tauka dikeramak jelu tu ulih berubat tumu.

“Jaku gerah nuju peranak ba genturung pendiau di Jalai Belatok, Jalai Sejijak, Jalai Alam Indah, Jalai Kampung Kalong 1, Jalai Batu Kawa-Matang, SJK Chung Hua Sungai Tengah, SK Tan Sri Datuk Haji Mohamed enggau SK Simon’s Church Malihah.

“Pia mega kita ke diau ba Lorong Belatok, Lorong Bowood, Taman Malihah, Taman Malihah Jaya, Taman Sri Malihah A, Taman Punica enggau Taman Murni.

“Nyema kita kala diketup tauka dikeramak ukui tauka mayau dalam timpuh November 2023 nyentuk diatu enggau bedau kala berubat, datai lengkas ngagai klinik besemak,” ku penerang nya.

Kelimpah ari nya, penerang nya mega ngasuh sida ti kala diketup tauka dikeramak ukui tauka mayau tau ngagai klinik perintah besemak di Klinik Pengerai (KK) Malihah, KK Batu Kawa, Klinik Komuniti Batu Kawa, KK UTC, KK Jalai Masjid enggau KK ti besemak.

Ku penerang tu mega, gerah nya nyengkaum orang ti bisi dijilat mayau tauka ukui ba abi bakal.

“Seliah tumu, dikena nyeliahka pemidang,” ku penerang nya.

Sebedau tu, Bagi Menua Kuching dikenuku nyadi zon pengerekai penyakit rabies lebuh bisi dua kes pemati diripotka kena 9 enggau 20 Januari tu tadi.

Naka diatu, Sarawak ngenukuka empat bagi menua dirampit rabies iya nya Kuching, Bintulu, Kota Samarahan enggau Serian.

Mensia mayuh dipinta bejaga sereta bejimat ngambika ulih nyeliah penyakit rabies di menua tu kelebih agi lebuh ngintu ukui tauka mayau lelang.

BERITA LAIN

BERITA TERBARU