Janang temegah nyadi Top 50 Impact Lifetime Achievement Award

KUCHING: Datuk Ir Janang Bungsu madahka diri berasai gaga enggau temegah ati pengudah nyadi siku entara penerima Top 50 Impact Lifetime Achievement Award, apin lama ke udah.

Direktor Pengatur Pengawa Konsortium Bumi Consultants and Services nya madahka diri temegah ati laban iya penerima tunggal ari Sarawak bulih anugerah nya.

Pia mega ku Janang, serikat iya nadai kala nganjung chalun nerima anugerah nya lalu nya mega anugerah ke-11 diterima kenyau ari anugerah keterubah diterima iya ba taun 2015.

“Kebendar, penerima anugerah ti diatur KSI tu dipilih nitihka ‘database’.

“Ba aku, anugerah ti diterima nya mandangka kitai nyulut lalu pengawa kitai udah diaku.

“Anugerah tu ukai semina ungkup diri aja tang mai nama menua sereta ngayanka Sarawak diaku,” ku iya lebuh dirandau Suara Sarawak ba opis iya, ditu kemari.

Suara Sarawak