Japai juluk kita nyadi tukang sumai profesional ba KSC

KUCHING: Kuching Skill College (KSC) entara palan pematih pengelandik peribit ti nyendiaka program seni kulinari.

Ketuai Pegawai Eksekutif, Novert Sullang madahka program kulinari tu deka ngajar bala nembiak pasal tanggung pengawa gawa ba industri hospitaliti enggau kulinari.

Ku iya, penyelai pemakai ba Malaysia tu nyendiaka peluang besai menua kitai angkat nyadi palan kulinari dunya.

“Penyelai tu nyadi pengelebih ngagai menua kitai matak orang ba serata dunya datai kitu laban deka nyepi asai pemakai tu.

“Ba penemu aku, kulinari tu entara industri baru ke majak ngerembai enggau diterima komuniti taja pan pandemik Covid-19 agi ngerekai.

“Nya kebuah aku andal amat industri tu deka nyendiaka peluang besai ngagai pengereja ti landik enggau bisi peneleba dalam seni kulinari enggau hospitaliti,” ku iya lebuh dirandau Suara Sarawak.

Novert madah, ba KSC sida deka ngajar bala nembiak ti ngambi program nya ba mayuh bansa pengawa, nelebaka diri enggau ngatur pengawa enggau jam gawa.

Penerang silik tauka tanya bukai pasal kus kulinari tu tau telefon nuju Adrian ba lumur 016-859 5540 enggau Audrie ba lumur 012-601 0366.

Mensia mayuh ke deka nemu silik pasal program tu mega tau meda penerang ba website https://kuchingskills.edu.my/

Suara Sarawak