KUCHING: Pemerani bala tuai Sarawak nagih hak Sarawak ba Sempekat Malaysia 1963 (MA) patut dipuji enggau dibasa.
Yang di-Pertuan Dewan Negara, Tan Sri Wan Junaidi Tuanku Jaafar madah, pekara nya beguna amat dikena meri penyedar ngagai rayat ba nengeri tu senentang semua hak enggau kuasa dikembuan ngambi enda tinggal ba pemansang menua.
“Nya alai, kitai chukup muji pemerani bala tuai Sarawak enggau raban bekaul dikena meri penyedar ngagai rayat ngambi ngaku hak dikembuan kitai.
“Pengudah pekara tu dipunka ex-Kepala Menteri, niang Tan Sri Adenan Satem, inisiatif nagih baru kuasa enggau hak kitai tu chakah ditampung Premier Sarawak, Datuk Patinggi Tan Sri Abang Johari Tun Openg nyentuk diatu,” ku iya.
Wan Junaidi mansutka jaku nya rambau Pengawa Bejurai Khas Aum Antarabansa Sejarah Sarawak (PASS) 2023 ditu, ensanus.
Ngelansa silik, ku iya, atur agresif enggau tebuka niang Adenan mujur ngerandang jalai sereta meransang anak Sarawak ransing enggau berani nagih hak nengeri tu.
“Sebedau tu, ukai kitai enda nemu senentang MA63, kitai nemu. Tang maya nya, kitai takut laban bisi undang-undang Akta Keselamatan Dalam Negeri (ISA).
“Undang-undang ISA maya nya nangkap sebarang orang ti mantaika pekara nya nyentuk bisi orang enda nemu penyalah diri ditangkap lalu dijil.
“Nya kebuah ngelama tu Sarawak diau diri aja,” ku iya.
Iya nyemetak madah, dokumen MA63 endang sebengkah sempekat disetuju ketetiga raban rambau numbuhka Konstitusyen Malaysia ti meruan bisi nyentuk diatu lalu nya beguna amat dikena nagih baru hak rayat ba kededua wilayah baka dipesetuju ba sempekat 1963 nya.
