Jasa besai raban volunteer, komuniti

KUCHING: Opis Bomba enggau Penyah Penusah Malaysia (JBPM) Sarawak komited mutarka penusah angus enggau penanggul besebun ba menua tu.

Direktor JBPM Sarawak PKPjB Khirudin Drahman @ Hussaini madah naka diatu, sida agi ngena aset raban bomba menua tu empu.

“Kitai chukup benasip laban bisi bantu ari Bomba Volunteer enggau komuniti ba menua tu besaup enggau kita mutarka penusah.

“Ambika chunto baka kes angus ti nyadi di Pulau Bruit enggau Tanjong Manis, ke alai kitai beratika tu pengawa chukup manah enggau jasa besai bala komiti,” ku iya.

Khirudin madah munyi nya lebuh dirandau pemberita pengudah pengawa nutup Aum Besai Raban Inovatif & Kreatif (KIK) renggat JBPM Sarawak 2019 ba Galeri Pustaka Negeri Sarawak ditu tadi.

Nangkan nya ku iya, mayuh bengkah ejensi bukai mega bela nyaup sida mutarka penusah nya.

NERANG… Khirudin ngelalau mensia mayuh sama nyaga pemeresi rampa menua lalu enda nunu babas sebarang.

“Di Miri, Chairman Komiti Penusah pelilih nya udah ngerah ejensi bekaul mantu raban JBPM gawa.

“Aku mega bisi dipadah pasal raban soldadu, Raban Nyaga Pengelikun Mensia Mayuh (APM) enggau Opis Kereja Raya (JKR) udah besaup mutarka penusah ti nuntung menua diatu,” ku iya.

Ku Khirudin, naka diatu, raban JBPM gawa nitihka gintir ari 12 ngagai 24 jam.

“Nengah chara gawa baka tu, kami nerima bantu ari raban bomba ke bukai.

“Enti hari bukai, kitai bisi 20 iku tubuh gawa lalu nengah gintir 24 jam tu kitai nambah ngagai 35,” ku iya nerang silik.

Berebak enggau nya, Khirudin mega madahka enti sema penusah angus tu enda teputar deka mai penanggul besai kelebih agi ngagai pejalai sekula.

“Mayuh palan dituntung penusah angus besemak enggau sekula lalu meri pangka besai ngagai sekula nya empu.

“Enti pekara tu enda diputar enggau jampat, kitai nadai pilih bukai kelimpah ngemanjaika timpuh sekula kemisi,” terang iya nyemetak.

Iya mega ngarapka penusah angus enggau gaya hari besebun tu ulih diputar enggau jampat sebedau kemisi sekula abis sereta ngarapka bisi ujan dalam minggu tu.