KUCHING: Pemerani Datuk (Sarjan) Dr Awang Raweng berambunka nyawa ngelaban munsuh maya agi dalam servis soldadu kelia endang patut seruran dikeingat kitai semua.
Sapit Kepala Menteri Datuk Amar Douglas Uggah Embas madahka ulah bujang berani tu nadai endur manding laban sanggup begadai nyawa iya empu lebuh beperang.
“Ketegal pemerani nya Awang lalu dipebasa nerima anugerah George Cross ari Perintah British.
“Udah nya ila pinchin kena taun 1960, tang ba taun 1963 Awang lalu direjister baru ngambi bagi lebuh Konfrantasyen Indonesia,” ku iya lebuh macha cherita Awang Raweng di Balai Suarah ditu, tadi.
Tandu Uggah, badu dalam servis soldadu Awang pulai ke menua iya empu di Nanga Skrang lalu dipadu nyadi tuai rumah din nyentuk taun 2018.
“Niang tebilang laban ngembuan peneleba ngelala munsuh sereta bepeneleba dalam kampung.
“Iya diambi nyadi ‘scouts’ ba unit British maya ngelaban Parti Komunis Malaya.
“Lebuh maya perang enggau komunis kena 27 May 1951 di Johor, Awang mantaika pemerani iya ti ngujungka iya diberi anugerah George Cross,” ku iya.
Kenu ku iya, jaku ‘agi idup agi ngelaban’ tetap meruan nyadi buah kenang nuju Awang ti udah mayuh bejasa ngagai menua.
“Ngarapka pemerani enggau pemanah iya tegut disimpan dalam pengingat kitai semua taja udah beserara,” ku iya.
Niang nadai ba umur 104 taun urung jam 2.15 lemai 18 September tu tadi ba rumah anak iya di Jalai Padri, Sri Aman.
Awang dipebasa nerima anugerah George Cross kena 20 November 1951 lalu dikangau ninting dua taun sekali ke London maya ngintu hari pengada Ratu Elizabeth ll.
