SERIAN: Ukui penyidi ari disiplin Cadaver, Cliff mujur ditumbak ba tanah belakang palan ngurung ukui K9 Balai Bomba enggau Penyah Penusah (BBP) Serian urung pukul 10 pagi tadi.

Pemidang Cliff ti udah gawa pengelama manggai enam taun begulai enggau Opis Bomba enggau Penyah Penusah Malaysia (JBPM) Sarawak balat ‘mangka’ pelatih iya, PBK I KUP Steven Ambu ti lenyau ukui penyidi ti dikesayau nya.

Mulaika kenang enggau Cliff, Steven madahka nya ukui pelatih terubah iya kenyau bepindah ngagai Sarawak ba taun 2018.

“Kami masuk ba taun ti sama tang aku ngeripot diri pun taun seraya Cliff dibai kitu Disember 2018.

“Sinu ngenang pemidang Cliff laban ngelama tu iya nadai mantaika kelai sakit,” ku iya.

Ku Steven, Cliff dikenuku parai maya Hari Krismas tu tadi enggau nadai mantaika kelai sakit.