Jauh ari diri sebilik, ati meseti tan nempuh penguji

Meri servis lebih 20 taun begulai enggau Opis Menteri Menua Luar, nama Fenny Nuli ukai nama ti enda dikelala agi pengudah iya dichiri nyadi Duta Besai Malaysia ke Peru apin lama ke udah.

Lebuh dirandau pemberita Suara Sarawak kemari, Fenny madahka diri udah berengkah gawa ba baruh Opis Menteri Menua Luar kenyau ari 15 September 1997.

“Lebuh nya, aku berengkah nyadi Pemesai Pengereja Pengawa Diplomatik .

“Aku berengkah gawa ba Opis Duta Malaysia enti enda salah ingat aku ba taun 2000, lalu berengkah enggau menua Geneva tang nyadi pengari mendam ba pengawa ngetanka hak mensia mayuh,” ku iya.

Ku Fenny, ba taun 2001, iya gawa di Poland sebedau pulai ke Malaysia lalu meri servis ngagai Opis Menteri Menua Luar.

“Ba taun 2009-2013, aku gawa ba Opis Duta Malaysia ke Thailand lalu pulai ngagai Putrajaya sebedau ke Brussels, Belgium ba taun 2016 ngagai September 2019, iya nya sebedau aku dichiri nyadi Duta Besai Malaysia ke Peru,” ku iya nerangka mimit peneleba iya gawa begulai ba Opis Menteri Menua Luar.

Pemanjai gawa nyadi pemesai ba Opis Menteri Menua Luar, Fenny madahka mayuh udah pemar sereta penguji ti ditapi iya kelebih agi lebuh gawa ba menua orang tang nya siti pekara ti mit ngagai raban diplomat.

“Kami endang udah dilatih ngambika tan sereta kering nempuh semua penguji ti ditapi kami pemanjai pengawa kamu.

“Tang ba aku empu, penguji enggau pemar nya mayuh agi ngagai pekara diasai diri empu, enda ngira ba menua luar tauka lebuh gawa ba Putrajaya, pemar ba aku iya nya lebuh jauh ari ruang bilik,” ku iya madah.

Fenny madahka taja udah mayuh gawa ba menua orang berengkah ari iya nampung pelajar di Universiti Sains Malaysia (USM) Pulau Pinang, tang jauh ari apai indai enggau diri menyadi pekara ti pemadu pedis diasaika iya.

“Gaya hari ti chelap ba menua orang, pemakai…semua nya ulih dipelajarka ke kitai magang. Nadai penanggul ba pekara nya,” ku iya. (Berita penuh ulih dipeda ba Surat Kabar Suara Sarawak Pagila)

 

FENNY NULI

Suara Sarawak