KUCHING: Tebilang ketegal mee undang galah besai, D’Siah Cafe Sebangan suah nyadi palan endur mensia mayuh ngetu merarau dalam pejalai entara Sebuyau ngagai Kota Samarahan.

Tauke kedai makai tu, Siah Owen, 58 taun madahka, iya berengkah nguji ngaul diri dalam dagang pemakai kenyau bulan Oktober taun nyin kemari.

“Aku suah enggau kus nyumai ti diatur ejensi bekaul baikka ba menua tauka ba palan bukai baka di Simunjan, Sebuyau enggau ke bukai.

“Ari nya, aku matih diri nyumai lebuh bisi pengerami sereta bejual di kampung lebuh bisi awak,” ku iya lebuh dirandau Suara Sarawak apin lama ke udaj.

Siah ti diau ba Kampung Arus Dayak madahka, kedai makai iya nya majak dikelala mensia mayuh ari mee undang galah, laksa Sarawak enggau asi guring dabai.

“Aku mega bisi nguring asi bukai baka asi guring belachan, mee guring, kolo mee, asi lemak, kue tiaw guring, bihun guring enggau ke bukai, tang mee undang galah suah agi laku.

“Mee undang galah dijual aku nitihka tiga bansa laban aku ngerunding bajet pemeli iya nya A, B enggau C.

“Ungkup mee undang galah A pemadu besai, B jelan pemesai enggau C mit dijual ari rega RM25 ngagai RM15,” ku iya.

Tandu Siah, kedai makai iya suah endur orang singgah laban ngembuan palan ngeletak kerita ti luas sereta enda ngachau orang ti mansa.

“Seraya makai sida agi ulih ngemataka kerita enda jauh ari kedai.

“Kelimpah ari nya, aku mai tim D’Siah Cafe Sebangan nyambut bala temuai ti datai makai ditu enggau penuh basa ngambika orang enda leju datai.

“Dalam dagang, kitai mesti bebasaka semua orang ti datai awakka basa kitai tetap dikenang taja orang nya udah pulai, laban siti hari ila iya deka singgah ditu baru,” ku iya.

Ku Siah, entara kenang manis pengelama iya udah muka kedai semak SJK Chung Hua Sebangan tu, kedai iya kala digusung Kaban Parlimen Batang Lupar Datuk Rohani Abdul Karim.

“Nya nyadi peransang aku deka ngemajuka kedai tu ngambika enda putus nerima bala temuai.

“Aku mega beterima kasih ngagai bala kaban ti suah nyukung D’Siah Cafe Sebangan ngelama tu.

“Sukung enggau peransang kita tetap aku kenang lalu aku ngarapka dagang kedai makai tu terus nyulut jemah ila,” ku iya,

Barang sapa deka nguji nyepi mee undang galah D’Siah Cafe Sebangan kita tau betelefon ngagai Siah empu ba lumur 0145840658 tauka ngelawa facebook iya Sia Owen.