KUCHING: Opis Bomba enggau Penyah Penusah Malaysia (JBPM) Sarawak udah nyikap diri napi musin landas ti tau ngujungka penusah bah bepun bulan tu nyentuk ke March taun baru.
Direktor JBPM Sarawak, Khirudin Drahman madahka diri andalka raban bomba betubuh kira-kira 1,194 iku udah nyikap diri ari sukut runding enggau perengkaguna ti dikena mantu mensia mayuh maya dituntung penusah bah besai.
“Penyampau 230 Raban Bomba Bantu (PBB), 2,259 Raban Bomba Sukarela (PBS) ari 53 tim, 7,453 Raban Bomba Komuniti enggau 10,107 iku Raban Pengesah Komuniti Tasah (Cert) selampur menua udah sedia napi sebarang penusah.
“Ari sukut perengkaguna, JPBM Sarawak bisi 45 buah bot, 16 buah lori tiga tan enggau lima tan, 67 buah 4WD enggau sebuah bilun di Miri udah disediaka,” ku iya.
Khirudin bejaku munyi nya lebuh aum pemberita nyikap JBPM Sarawak napi Monsun Timur Laut ditu tadi.
Ku iya, nitihka gaya angin datai ari menua Filipina, menua Sri Aman ngagai Simunjan, Sebuyau enggau palan pesisir pantai Zon 2 enggau Zon 3 dipelabaka deka napi penusah bah dalam timpuh nya lebuh tikas peninggi gelumbang tasik sereta ujan bangat.
