JULAU: Gerempung Komuniti Pemansang Julau (JDCA) udah mutuska tujuh bengkah pekara ti deka dibantaika gerempung tu ngagai perintah ungkup ngelengkaska pemansangka ba menua Julau.
Chairman iya, Ex-Kaunselor Ijau Mudai madah entara tujuh pekara ti bisi dipejuraika ba aum JDCA ke diatur ba Bilik Aum Kaunsil Pelilih Menua Meradong enggau Julau (MDMJ) iya nya minta perintah ngemanahka klinik pengerai nyadi poliklinik enggau sepital dikena nangkup peminta mensia ke udah mayuh begunaka servis berubat.
JDCA mega ngansak perintah ngelengkaska agi pengawa ngemanahka loji bekal ai beresi di menua Julau enggau mega nyambung ai paip ari Opis Bekal Ai Beresi Menua Pesisir (JBALB) ngagai rumah panjai ke udah datai jalai.
Pia mega ku Ijau, ba aum tu mega sida iya bisi minta perintah ngemanahka agi arus penyambung baka ngaga laju agi internet enggau lengkas ambika penguntung enggau pemaik ungkup bala nembiak, pengajar enggau mensia mayuh ti semampai begunaka arus penyambung dikena ngereja mayuh macham pengawa.
Ngelansa pasal projek jalai alun, JDCA mega ngansak perintah enggau pengari rayat ba sitak tu ngelengkaska agi pengawa ngaga jalai ari Nanga Meluan nyentukka Nanga Ju enggau Mujok.
Pia mega sida iya minta perintah nangkir jalai ba Nanga Bulo nyentuk ke Rantau Limau Ulu Kanowit laban jalai kediatu iya nya ari Nanga Entabai ngagai Nanga Bulo kelalu mit lalu enda likun ditengah.
JDCA mega arapka Opis Menteri Pengawa Dagang Dalam Menua, Gerempung Kerejasama enggau Penguna (KPDNKK) semampai beratika sereta matau bekaul rega barang ti semampai niki kelebih agi barang ti diguna ninting hari ba pasar mit di menua pesisir.
Ba aum tu mega, JDCA madahka perintah endang patut ngaga sebuah Balai Bomba ungkup menua Julau kelimpah ari meri latih enggau perengka pemadam api ungkup rumah panjai enggau chara berenggat.
“Tu endang entara batang aum ti bisi udah dipejuraika kami lalu aum tu ila deka dibai ngagai Aum Besai Ninting Taun (AGM) ungkup gerempung tu ti deka diatur kena 14 Mei tu ila,” ku Ijau.
