Di Sarawak, lebih agi ba menua pesisir tubah palan ke memanah bisi penau nyadi produk dagang temuai nyema iya nerima perati enggau dikemansangka enggau meruan nengah ejensi ke bekaul.
Ambika chunto ba menua Usun Apau di Murum bisi sebengkah palan ke chukup manah ungkup mensia mayuh ti rinduka aktiviti memarin (bemalam ba tebing sungai), berikan tauka pengawa ekstrem ba puak kampung puang iya nya ba Jelatung Ulu Danum.
Siku peranak Lepo Badeng, Sungai Koyan di Belaga iya nya Romio Ding madahka Jelatung Ulu Danum ba Usun Apau di Murum ditu tau bendar dikemansangka nyadi siti palan dagang temuai laban temuai ulih ngasaika peneleba bemalam ba kampung puang enggau diau ba jelatung ba puak tasik ti jarang ditemu ba alai bukai.
PEJALAI ARI BINTULU
“Pejalai ngelawa palan tu enti kitai ari Bintulu ngagai Simpang Bakun begunaka awak urung setengah jam lalu mensia mayuh dipinta bekenaka entukar ‘Four Wheel’ tauka 4×4.
“Tu ungkup pengelikun sereta dikena nyeliahka sebarang penanggul sebelah rantau jalai, laban pejalai ari Simpang Bakun nuju jelatung tu bisi betengahka jalai batang urung sejam sebedau datai ba Simpang Sungai Asap.
“Nya alai, barang sapa ti bisi ati deka ngasaika peneleba bemalam ba Jelatung Ulu Danum tu diperansang nyikap diri ari semua sukut kelimpah anang ngambi mudah enggau pekara bekaul enggau pengelikun diri.
MANSA 15 RUMAH PANJAI
“Belabuh ari Simpang Sungai Asap tu, kitai ulih meda urung 15 buah rumah panjai kaban kitai bebansa Kenyah, Kayan, Lahanan enggau Penan sebedau datai ba Simpang Tekat Ai Murum enggau Bakun.
“Lalu bisi sekeda rumah panjai tu nyendiaka servis alai temuai bemalam tauka ngenduh enda lama dikumbai ‘Homestay’ ngagai temuai ti deka ngasai kediri peneleba diau ba rumah panjai ditu.
“Ari Simpang Murum ke Tekat Ai Murum nya mega begunaka awak urung sejam agi sebedau nyambung pejalai ngena perau nuju Jelatung Ulu Danum tu,” ku iya maya dirandau Ruai Suara Sarawak.
Romio ke mega tauke Bakunparadise Enterprise ngarapka pemansang infrastruktur di Murum ditu ulih dikemanahka agi ngambi palan tu ulih narit penatai temuai enggau sampal sekali nya ari menua luar tauka peranak Sarawak empu.
NYUNGKAK EKONOMI
“Enti tu mujur dikereja, aku pechaya lalu angkunka aktiviti ekonomi peranak asal deditu deka ranchak agi kelimpah sida mega bepeluang sama ngasaika ubah pemansang baka diasai peranak menua enggau pelilih bukai.
“Tu siti ari chara kitai ulih mandang lalu ngelakuka daya idup asal kitai peranak Sarawak ngagai menua luar,” ku iya.
Ungkup penerang, sebarang sapa ti bisi ati deka nguji peneleba diau ba Jelatung Ulu Danum tau betelefon betanya ngagai Menijar Bakunparadise, Romio Ding ba lumur 016-868 3224 ungkup penerang silik bekaul penyampau bayar sewa chalet enggau ke bukai.
