Jematan ba tembawai lama SMK Sedaya enda likun

KANOWIT: Piak bekaul dipinta lengkas ngaduka jematan ba tembawai lama SMK Sedaya ditu ke semina nganti maya tebererak.

Pengiruh siku penguna media rama Andrewson Bugis ti mantaika pendiau jematan tu patut dipuji ngambika pekara tu diperatika piak ke bekaul.

“Jematan nya endang nyadi batang jalai ngelawa jelatung diguna mensia mayuh ninting hari lebih agi sida ke diau ba Nanga Pedai, Tuah, Bawan, Bejait, Mapai, Kabah enggau Nanga Tada enti deka nurun ke Pasar Kanowit.

“Jelatung ba taba lama SMK Sedaya tu kira ke ba seberai Pasar Kanowit. Tu diguna sida ke ngena perau ngelayang sungai maya deka nurun ke pasar,” ku iya madah ditu kemari.

Terang iya, ngena jalai sungai endang muntang agi ungkup sida ti enggai nengah jalai darat laban enda ibuh bepusin nengah Jematan Durun sebedau tama ke simpang Kanowit.

“Nyadi nya chukup jauh enti ngena kerita tang laban bisi jalai sungai tauka ngena perau semina ngelayang sungai aja.

“Nya kebuah jematan tu suah dikena, manah amat enti iya ulih dikemanah sebedau sbearang pekara enda disadang nyadi,” ku iya.

Andrewson madah, jelatung enggau jematan nya endang seruran penuh laban diguna mensia mayuh ti nurun ke pasar.

Iya madah jematan nya dipelabaka bepuluh taun pengelama udah digaga tang nyentuk ke sehari tu lalu empai digaga manah.

“Kitai ngarapka pengari rayat bekaul sereta piak bekuasa beratika pekara tu. Gaga manah utai ke diguna rayat taja diatu udah bisi jalai darat tang nya agi meruan diguna rayat mayuh,” ku tandu iya.