Jematan Batang Lupar: Ngemuntang pejalai ari Kuching – Miri

MALUDAM: Jematan Batang Lupar deka ngemuntangka agi pejalai mensia mayuh ari Kuching ngagai Miri.

Kepala Menteri, Datuk Patinggi Abang Johari Tun Openg madah perintah Sarawak deka neruska belanja ngaga Jematan Batang Lupar taja mayuh agih belanja dikena ngaga jematan nya ditarit pulai perintah besai.

“Suba nengah janji entara Tok Nan enggau menteri besai dulu suba Datuk Seri Najib Razak semua agih belanja deka dipesaup sama rata, 50-50.

“Tang pengudah perintah betukar, agih belanja nya enda nyadi lalu nya ngasuh jematan Batang Lupar enda nyadi digaga,” ku iya.

Abang Johari madah munyi nya rambau Pengerami Nasih Tanah Projek Rayat Skim Nangkir Kampung Maludam Fasa I enggau Masjid Baru Maludam ditu kemari.

BEJADI…. Abang Johari nyain papn projek kelai bejadika Pengerami Nasih Tanah Projek Rayat Skim Nangkir Kampung Maludam Fasa I enggau Masjid Baru Maludam.

Nangkanka nya, iya madah taja perintah besai ngembuan ulah ‘buruk siku’, perintah Sarawak enda sebaka enggau perintah besai tajapan agih belanja dikena ngaga nya besai.

“Nengah jematan Batang Lupar tu, menua Maludam deka nyadi siti menua ti ulih dikemansang nengah jalai menua pesisir.

“Jalai tu deka rembus ngagai jalai menua Bintulu enggau Miri,” ku iya.

Nambahka nya, Abang Johari tu nyadi siti kebuah mensia mayuh rindu agi nengah jalai tebing pantai laban semak agi ngelawa jalai besai.

“Enti jematan tu udah tembu, nyengkaum jematan ba Batang Lassa, pejalai ke Sibu semina dua jam setengah aja ari Kuching.

“Ari sukut pemansang, kitai ulih muka palan baru nyengkaum ba Maludam lalu tu manah ngagai pemansang jangka panjai,” ku Abang Johari ba jaku iya.

Semua ungkus dikena ngemesaika jalai ba menua Maludam nya kurang lebih RM40 juta lalu menua Maludam deka terus dikemansang.

Suara Sarawak