Pengawa ngaga baru Jematan Gantung Satok diperati ulih nyungkak penyelai mengeri Kuching seraya mulaika baru pengingat kelia peranak ke diau besemak enggau palan nya.
Jematan gantung tu kala runtuh kena 7 Oktober 2004 pengudah 78 taun nyadi jalai ditengah mensia mayuh kundang kandi ngelayang Sungai Sarawak.
Nya alai, jematan gantung endang ngundan sejarah kediri empu sereta patut ditemu mensia mayuh.
Kebendar langgur perambu ngaga jematan nya kelia bepun ari pengawa ngulihka bekal ai baru ungkup Kuching ke diambi ari tangki ai Matang urung taun 1902.
Batang tuju ngaga jematan nya suba ngambi bisi ditengah mensia mayuh ke nguna ensikal enggau bejalai kaki ngelayang ke seberai datai ari penemu Rajah Putih Kedua, Charles Brooke.
Bemacham langgur penemu bisi dibantai tang pengujung injinir milih ngaga entali paip nengah lansar sungai lalu enda ibuh nengah jematan gantung nya ketegal penanggul nangika jematan runtuh tauka rarat dibai ai sungai.
Ba taun 1917, Charles Brooke parai lalu ditukar anak iya Charles Vyner Brooke ke mega Rajah Putih Ketiga.
Rajah Putih Ketiga nampung juluk apai iya ngaga jematan gantung nya nengah bantu arkitek tebilang Eropah lalu projek berengkah digaga taun 1923.
Siku injinnir Opis Kereja Raya, A.S. Lowe ke mega menyadi Direktor C.P. Lowe dipadu ngaga pelin Jematan Gantung Satok ke bisi dipeda kitai diatu.
Tiga taun endur nembuka jematan gantung nya, nya alai ba taun 1926, jematan ke diining Rajah Putih Kedua udah nyadi nyata ungkup guna mensia mayuh.
Nya alai, penembu jematan nya kelia dikemegahka peranak menua nya kelimpah matak penatai temuai. Raban bujang dara ke benung bepangan mega ngambi awak ngelantang ati ba jematan nya.
Penerang panchar bulan ba endur nya diumba enggau munyi muzik endang ngelantang ati orang ti datai kia.
Taja pia, palan nya mega kala ngundan sejarah berantu ti ngenakutka ati mensia mayuh.
Cherita tu bepun ari siti kisah penyamun ke kala ngemegauka mensia mayuh maya pengawa ngaga jematan nya.
Pengawa tu dikaitka enggau adat Dayak kelia tu begunaka genselan dikena nasih tanah ungkup pengawa nirika palan baru sekalika nya rumah panjai tauka jematan.
Adat ngulun mensia dipunaska ba Sarawak taun 1886, tang adat genselan agi dikemeran. Sebedau nya, adat genselan endang nguna darah orang ke diulun.
Beduduk ari nya, ketegal ulun udah nadai agi, dia pengawa nya diperitaka ngena chara bukai ngaduka genselan iya nya numbuhka tim penyamun lalu ngayau ngiga pala.
Nya alai, berita pasal ngaga Jematan Gantung Satok maya nya kelia ngenakutka ati mensia mayuh ukai semina ungkup peranak Kuching tang mega ba selampur nengeri Sarawak ketegal ari cherita nya.
Bemacham cherita selebubu ngapa ngerembai baka gerah ari perintah ti ngasuh polis Sikh beragum panjai enggau betubuh besai nangkap anak ke sesegau ngapa maya malam hari ngambika ditepu ba lansar jematan nya.
Udah nya, kenu ku cherita orang ke gawa ba projek jematan nya udah bulih pala siku pengereja pengawa ke sama gawa ba jematan nengah chara nengelamka iya.
Pengudah jematan nya tembu digaga, bisi siti agi cherita ditusi ti ngasuh orang takut iya nya jematan nya nyau beganyang kelimpah tower iya dipeda nginsit ari endur asal sereta dipelabaka ketegal enda chukup genselan.
Ungkus dikena ngaga jematan gantung nya kelia sepenyampau $52,000 enggau peninggi 18 meter ari paras Sungai Sarawak sereta ngembuan pemanjai 213 meter.
Nitihka cherita mega madahka orang ke gawa ngaga jematan nya mayuh midang diambi semengat sigau ba jematan nya.
Nya alai, semua ungkus jematan gantung baru ke diatu manggai RM8.5 juta dikena nukar jematan gantung lama ke runtuh ketegal pangka kilat kena bulan Oktober 2004.
