Jematan Gantung SK Ng Lasi udah rusak!

JULAU:  Jematan Gantung Sekula Primari (SK) Nanga Lasi enda likun ditengah lalu patut dikemanah tauka diseleti enggau jampat.

Pengari Pemansang Nembiak Rebak Baru Pakan Julau (PNRB), Semana Sawang, ngelalau mensia mayuh kelebih agi nembiak sekula seruran bejimat lebuh nengah jematan nya.

Ku Semana, sida andal amat piak menggi tanggungpengawa deka ngerumban pengawa nyeleti jematan tu nentuka pengelikun bala nembiak, pengajar enggau staf sekula bukai.

“Penanggul tu udah lama ditapi peranak diau ditu kelebih agi sida ke diau enggau gawa berundang ngagai sekula tu.

“Suah mega sida nangika pengelikun diri laban kalang enggau papan tebelian ba jematan gantung nya mayuh udah tingkil tauka patah lalu enda sebela peninggi.

ENDA SEBELA… Gaya pendiau Jematan Gantung Nanga Lasi enda likun ditengah.

“Pagar ba sesepiak endur bepegai mega mayuh udah retai sereta patut diganti baru,” ku iya lebuh dirandau Suara Sarawak.

Nya kebuah iya minta piak bekaul mendingka peminta enggau sebana rayat menua nya.

Ku iya, kitai ukai deka besalahka sebarang piak tang semina minta sida nangkup peminta rayat nitihka pematut ngambika pengelikun dijamin lalu pengelantang ulih diintu meruan.

Jematan tu udah digaga dalam taun 1990 suba lalu kala diseleti dalam taun 2014 nengah Projek Nyeleti Jalai Genturung Pendiau, Jematan Belian Sungai Lasi Nanga Lasi, Julau di baruh Opis Menteri Pemansang Menua Pesisir Malaysia lebuh nya.

“Semua sida ke nguan menua tu ti datai ari lima buah rumah panjai enggau sebuah sekula sereta sebuah klinik bepanggai ba jematan tu nyadika jalai penyambung enggau menua luar.

“Kelimpah ari irauka pengelikun sida, kitai mega sinuka bala nembiak mit betengahka jalai enda likun mansang ngiga penemu.

“Pia mega sida ti gawa ba sekula enggau Klinik Nanga Lasi nyengkaum peranak lima buah rumah panjai seruran nangika pengelikun diri kelebih agi enti ai besai enggau deras ari ulu,” tandu iya.

Nya alai, sekali agi iya ngarap piak bekual bekaul ti udah dilempai tanggungpengawa ngintu pengelantang mensia mayuh jampat mutarka penanggul nya.

JALAI PENYAMBUNG… Jematan Gantung Nanga Lasi nyambung peranak ari lima buah rumah panjai, sebuah sekula enggau sebuah klinik.

 

ENDA LIKUN… Papan tebelian mayuh udah tebabak ditabanka arus deras sungai enti bah tunggal mangka ari ulu.