Jematan Long Lama dikemendar ngangkatka nama Tok Nan

MIRI: Perintah Sarawak setuju jematan Long Lama tu diberi nama ex- Kepala Menteri Niang Pehin Sri Adenan Satem (Tok Nan) nitihka peminta peranak ba Baram.

Kepala Menteri Datuk Patinggi Abang Johari Tun Openg madahka pekara nya lebuh bejaku bejadika jematan Long Lama, ditu kemari.

Iya madah, nama tu dikena ngenang jasa niang Tok Nan ti udah ngemendar bejalaika projek tu kelimpah nitihka peminta sida ti meri perambu nama jematan nya.

Pia mega ku Abang Johari, iya deka neruska pekara ti deka dipejalaika Tok Nan ungkup rayat sebedau tu iya nya pemansang menua pesisir.

“Taja Tok Nan udah ninggalka kitai, tang diatu kitai bisi Tok Johari ti deka neruska pengawa iya ngaga jematan tu.

PEMANSANG BARAM…Gambar penuh mandangka Jematan Long Lama ditimpai ari langit.

“Perintah Sarawak deka seruran ngemansangka kandang menua pesisir, dikemeratka kami (perintah nengeri) baka ba manifesto ti udah dibantai ba taun 2016 suba,” ku Abang Johari.
Nambahka nya ku iya, Perintah Gempung Parti Sarawak (GPS) deka seruran nentuka genap projek pemansang ti udah disemaya deka dipejalai.

“Kami (GPS) ukai semina besemaya tang mega bejalaika pengawa enda baka sida (Pakatan Harapan) ti semina landik bejaku aja,”.

Berebak enggau nya, Menteri Muda Jalai Pesisir Datuk Julaihi Narawi madahka pengawa ngaga jematan tu mujur tembu nitihka atur iya nya dalam timpuh tiga taun.

Ku iya, pengawa ngaga jematan tu ngayanka pengeran GPS ngangkatka tikas ekonomi peranak menua pesisir lebuh nyendiaka perengkaguna ti ulih meri pemaik ngagai semua rayat.

“Jematan tu deka meri pemaik ngagai 37,000 rayat ngelingi kandang menua tu lebuh ngemandakka pejalai sida dulu suba ti semina bepanggai ba servis feri aja,” ku iya nerang.

Urung 3,000 rayat Baram ngulu pengawa bejadika jematan tu siti sejarah ti lama udah dianti sida.

Jematan 573 meter urung 140 kilometer penyauh ari mengeri Miri tu dipelanja Perintah Sarawak.

Sama datai Sapit Kepala Menteri Tan Sri Datuk Amar Dr James Jemut Masing enggau Datuk Amar Douglas Uggah Embas, Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali, Kaban Parlimen Baram Anyi Ngau, Adun Mulu Datuk Gerawat Gala, Adun Telang Usan Dennis Ngau enggau Direktor Eksekutif Raban Serikat Shin Yang Tan Sri Datuk Ling Chiong Ho.

PEMANSANG BARAM…Gambar penuh mandangka Jematan Long Lama ditimpai ari langit.

 

 BEJADI PEMANSANG… Abang Johari (empat kanan) begulai enggau Uggah (tengah) sereta temuai dipebasa bukai bejadika jematan Long Lama, ditu kemari.

 

NAMA BERITA?…Abang Johari betabi jari enggau rayat Baram ti bela ngemata pengawa sejarah bejadika jematan Long Lama, kemari.