MENTERI MUDA Infrastruktur enggau Pemansang Penyangkai Kapal Datuk Julaihi Narawi madahka jematan ke beungkus RM848 juta nya bisi ngembuan dua pemagi iya nya nuju Sebuyau pemanjai 3 kilometer enggau nuju Triso pemanjai 2.8 kilometer.
“Kereja ngaga jematan udah berengkah taun 2020 enggau ungkus belanja penyampau RM66 juta.
“Jematan pemanjai 5.1 kilometer tu ngembuan dua alur jalai sereta ngembuan peninggi 26 meter ari tasik awakka kapal ti mansa ulih ensuruk jematan tu,” ku iya.
Pekara tu dipansutka iya lebuh Program Nasih Tanah Jematan Batang Lupar ti dipenyadika Kepala Menteri Datuk Patinggi Tan Sri Abang Johari Tun Openg kena bulan March tu tadi.
Ku iya, raja jematan nya mega bisi disikap enggau tali kabel pengetan panjai 600 meter.
Kelimpah ari nya, iya madahka jematan tu nyadi jematan pemadu strategik laban dipansa jalai pesisir ti sigi deka diguna semua penguna jalai alun ba serata Sarawak.
Iya mega madahka, nengah jematan tu jalai pesisir di Sarawak ulih bekaul magang ke alai pejalai ari selatan ke utara Sarawak muntang sereta pandak.
Jematan Batang Lupar tu sebagi ari 12 buah jematan baru ti digaga ba Sarawak nengah inisiatif perintah.
Semua ungkus ngaga jematan tu datai ari agih belanja Perintah Sarawak empu bekau sekeda ari agih belanja ngaga jematan nya dikinsilka sebedau tu.
