Jematan Sungai Bintangor ikonik dagang temuai jemah

KUCHING: Jematan Sungai Bintangor ba Jalai Datuk Ajibah Abol deka nyadi sebuah jematan ikonik endur pengawa dagang temuai pengudah tembu ila.

Kepala Menteri Datuk Patinggi Abang Johari Tun Openg madahka jematan nya sebagi ari pemansang ti digaga lebuh perintah deka ngemansangka genturung Jalai P. Ramlee enggau Jalai Haji Taha nyadi sebuah palan komersial dikumbai Hikmah Exchange.

“Palan tu deka nyadi palan komersial bepun ba simpang P. Ramlee, Jalai Satok lalu nuju Kampung Masjid enggau Kampung Bintangor.

“Jalai Sungai Bintangor diau ba entara Sungai Sarawak ke Satok (suba disebut Miramar tauka Sekula Chung Hua),” ku iya.

Abang Johari bejaku munyi nya lebuh ditanya pemberita pengudah Ngelawa Projek Ngaga Jematan Kampung Sungai Bintangor di Jalai Datuk Ajibah Abol ditu, kemari.

PELIN PROJEK…Datuk Patinggi Abang Johari Tun Openg (dua kiba) benung mendingka penerang ari piak ti ngemujurka projek Jematan Sungai Bintangor ti deka dikemansang. Bela bisi dipeda Datuk Ibrahim Baki (dua kana) sereta bala bukai. -Gambar Aliep Noni

Kenu ku iya, genturung kampung ti deka dikemansang nya ila deka disikap enggau servis perengkaguna dagang temuai ti meruan.

“Ba genturung palan tu, kitai bisi Brooke Dockyard ti ngembuan sejarah lama, sejarah penatai pengarap Islam ba masjid lama sereta kampung asal.

“Nya alai, kitai deka ngemansangka infrastruktur ti lebih manah. Lebuh udah tama ngagai simpang jalai bisi sekeda jalai patut diseleti besai agi, taja pia pengawa nya enda meri pangka (menjejaskan) ngagai rumah enggau tanah orang ti diau ditu,” ku iya.

Tandu iya, pemansang jalai nya ila deka digaga nyentukka ngagai Jalai Haji Matair.

“Ketegal nya jematan ti udah bisi ditu sempit, nya alai kitai ngaga jematan tu besai agi.

“Jematan baru tu ila deka ngena langkar baru laban deka ngasuh jematan nya nyadi jematan ikonik endur narit bala temuai meda gaya pengidup asal orang ditu,” ku iya.

Iya madahka, pekara nya deka meri pangka dagang ti lebih besai ngagai peranak ti diau ba genturung nya.

“Kitai deka meresi sungai, laban kampung tu besambung enggau Waterfront sereta Brooke Dockyard.

“Temuai ulih bejalai kaki ari pasar besai kitu tauka ari palan tu ngagai pasar besai.

“Ari nya Brooke Dockyard deka berubah nyadi palan komersial, ukai semina ungkup bejual sayur tang bejual barang pakai,” ku iya nerang silik.

Kelimpah ari nya, Abang Johari madahka jematan ti beungkus urung RM50 juta nya ila deka tembu dalam timpuh tiga taun (36 bulan) nyentukka taun 2022.

“Mayuh jematan baru udah digaga ngena langkar baru baka Jembatan Limbang, Jematan Kemena, Jematan Batang Lupar, Jematan Sungai Mujoh Baleh enggau Jematan Rambungan,” ku iya.

Sama bisi datai Menteri Muda Infrastruktur enggau Pemansang Penyangkai Kapal Datuk Julaihi Narawi, Sapit Ketuai PBB Pampang Dun Satok Datuk Ibrahim Baki enggau bala bukai.

Suara Sarawak