PAKAN: Tuai Rumah (TR) Jabang Tinggi ari Lubok Betekup ditu minta pengari rayat ke udah menang dipilih rayat Pakan mantu ngemanahka jematan kayu ke udah lama ti nyadi batang jalai sida iya ngelayang ke tanah seberai.
Jematan nya endang siti aja jalai dikena ngelayang Sungai Wak ngagai rumah sida iya ba Lubok Betekup kelebih agi lebuh maya Hari Minggu endang semampai ditengah lebuh maya sembiang laban dia bisi sebuah gerija.
“Aku minta perintah meri projek dikena nukar jematan kayu ke udah lama tu. Laban jematan tu semina ulih dikena jalai kaki aja lalu enda ulih tengah kereban pengangkut,” ku iya nusui sebana ngagai Suara Sarawak, tadi.
Nitihka penerang ari Tr Jabang, jematan kayu tu udah lama amat tang lalu bedau diganti ambika pemaik bala ke betengahka jematan nya besehari-hari tambah mega kayu dikena nyadika geladak jematan udah lama.
“Aku arapka perintah ulih nukar jematan tu mih ambika kerita pan ulih dibai ke seberai. Naka tu kerita semina tinggal ba sebelah tisi kedai Cina Nanga Wak,” ku iya.
