KUCHING: Jaguh nyemerai para menua, Jamery Siga (S5) lantang sereta gaga ati pengudah nama iya dirintai masuk ngagai Pekit Lumba Paralimpik Tokyo 2020 ti deka diatur bulan Ohos tu.

Pemutus nama atlit nyemerai asal ari Kampung Kuala Mendalam, Ulu Mendamit, Limbang nya ditemu lebuh nerima sepuchuk surat ari gerempung besai Nyemerai Para Dunya kena Hari Dua tu tadi.

“Kemari, jurulatih udah telefon ngagai aku lalu madahka nama aku bisi dirintai bepekit ba Lumba Paralimpik Tokyo 2020.

“Enda ngadang nama aku dipasuk baru pengudah dipadahka enda bepekit ba menua Jipun nya beduduk ari format diubah tuai rumah nya,” ku Jamery ti lantang ati nerima berita manah nya.

Taja pia, Jamery berasai lantang ati laban diberi peluang ngarika menua ba pekit dunya nya ila.

“Aku naka ulih bepekit enggau bala atlit bukai lalu deka mai midul ngagai kem kontinjen menua,” ku iya seraya ngaku nya ketiga kali iya masuk ba pekit empat taun sekali nya pengudah Pekit Lumba Paralimpik London 2012 enggau Pekit Lumba Paralimpik Rio, Brazil 2016.

Taja pia, iya semina deka bepekit ba siti kategori iya nya 50 meter kupu-kupu ba Pekit Lumba Paralimpik Tokyo 2020 ila.