Jereki ari buluh nyaup ngemujur bala anak besekula

KUCHING: Semina ngena batang buluh Edwin Sijan ari Kampung Pichin, Serian mujur nyengulaka semua anak iya datai ke sida besai.

Apai ngagai tiga iku anak tu madahka iya bepun ngiga rejeki ari buluh kenyau taun 1984 kelia.

“Aku sigi nemu mantap sereta ngukir buluh ari mit diajar apai.
“Ari buluh tu mih aku nupi tiga iku anak dataika sida mujur bulih kereja, anak indu aku ke tuai udah nyadi misi ba sepital,” ku iya.

Edwin bejaku munyi nya lebuh ditanya pemberita ba rambau pengerami Regata Sarawak tu tadi.

Ku iya, buluh ti diulih iya deka digaga nyadi tabung duit syiling dijual iya enggau rega RM3.60 siti.

“Dalam sebulan aku ulih nyual urung 400 igi tabung buluh tu. Orang rindu meli laban buluh nya lalu diukir aku empu enggau bemacham chura.

“Enti sida meli mayuh murah agi rega dijual aku laban teleba agi sida meli beratus iti ke tepa,” ku iya.

Edwin madah, ketegal pengelandik iya ngukir buluh dia iya lalu dibantu Gerempung Kraf Jari Malaysia ngaga bengkel endur ngaga tabung ari buluh.

“Ba taun 2003 sida Gerempung Kraftangan Malaysia lalu mantu aku muka bengkel endur bejalaika dagang laban aku bisi pengelandik ngukir.

“Baka pengerami sekali tu (Regata Sarawak), puji Tuhan aku bisi bulih asil dalam RM4,200,” ku iya.

Edwin Sijan