ARTIKEL

Jereki Jeffery Gambang bekebun

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Taja baru setaun ngaul diri ba pengawa betanam betupi, Jeffery Gambang udah bulih asil manggai RM2,500 sebulan.

Peranak asal Sungai Lengan, Sibu madah, pemisi teknologi baru udah ngemuntangka pengawa iya kelebih agi lebuh nanam enggau ngetau asil nya.

Jeffery, 27 taun madah, sebedau tu iya bisi ngaga pes tang diatu udah ngetu lalu ngereja pengawa bekebun aja.

“Pengawa bekebun tu ukai juluk ati aku tang nadai ku enggau laban naka diatu aku ngereja pengawa asal ulih ngiga makai aja.

“Tang lebuh ‘terejun’ ngagai pengawa betanam betupi, aku deka bebendar ngemansangka pengawa nya nyentuk mansutka asil.

“Aku ngepunka pengawa betanam betupi tu laban nyepi diri pedis bendar begigaka pengawa jam diatu.

“Taja besekula tinggi, ukai reti mantul ngapa lebuh enda bulih kereja ke menyana, nyangka bisi jereki bukai ungkup aku.

“Asal tua kering semengat aja sereta bisi pengandal ngagai diri empu nitihka singkang bansa bukai.

“Aku baru setaun ngaul diri ba pengawa bekebun tang Puji Tuhan, asil ari pengawa bekebun tu chukup dikena meli kereban kena nembunka leka buah tu,” ku Jeffery ngepunka randau enggau Suara Sarawak.

Entara sayur ditanam Jeffery iya nya chabi, terung enggau semangka tasik.

GALAK… Terung ditanam Jeffery benung bebuah sereta manah diketau.

FERTIGASYEN

Ku Jeffery, ba pengawa bekebun tu iya ngena sistem fertigasyen ke mega dikumbai pengawa bekebun chara moden.

Iya mega madah, pengawa bekebun chara moden tu muntang agi laban enda bepegaika changkul baka orang kelia.

Nambahka nya ku iya, taja baru setaun ba pengawa bekebun tu tang untung iya sebulan manggai RM2,500.

Iya mega madahka pengawa betanam betupi chara moden tu nipakka juluk Perintah Sarawak dipegai Kepala Menteri Datuk Patinggi Abang Johari Tun Openg baka sistem fertigasyen ti dikemansang diatu.

“Ba penemu aku, teknologi moden ba pengawa betanam betupi tu ngembuan mayuh pengelebih ungkup kami bala pekebun.

“Kesatu nya, pengawa tu bebida amat ari kitai ke betanam sayur enggau buah tu ba tanah.

“Kedua nya pengawa nyau muntang laban enda kiruh meri sum ninting hari enggau mantun rumput baka dikena chara kitai kelia.

“Tang, aku tetap nurun meda gaya utai tanam taja udah bisi teknologi moden.

“Kebuah pia laban gaya hari nemu berubah lalu ba sistem fertiasgeyn tu mega utai mesti dipelajar, nyau baka kitai ke belajar nya meh.

“Pemanah ketiga nya ba jeman moden diatu kitai ulih nyual sereta ngelakuka sayur enggau buah nya nengah online.

“Tambah mega, kitai ulih ngiga penerang ke silik pasal chara betanam betupi nengah bemacham pelasar digital baka ba website, Facebook enggau ke bukai,” terang Jeffery.

Nambahka nya, Jeffery madahka orang ke balat meransang sereta ngembing iya ba pengawa bekebun tu iya nya Mr Lau.

Ku iya, iya berani ngereja pengawa bekebun berekat pengeransing Mr Lau ngembing sereta ngajar iya sentang pengawa betanam chara moden diatu.

ASIL BEKEBUN… Buah semangka tasik bebuah sereta galak

NGETAU ASIL

Naka diatu, Jeffery madahka iya semina bekebun ba tisi rumah aja lalu nyema bisi jereki bukai iya ngarapka udah tu ulih betanam ba endur bukai.

Iya mega madahka chabi ulih mansutka asil pengudah empat bulan sereta terung enggau semangka tasik deka mansutka asil pengudah dua bulan setengah.

Terang Jeffery, iya madahka buah enggau sayur ba kebun nya suah diborong ba Tamu Sibu lalu kadang iya bisi ngatur Open Day nyual semangka tasik.

“Baka chabi nya, terubah kitai deka ngaga chemai pengelama sebulan, udah nya pindah ngagai polybag lalu bulan ke empat deka mansutka asil.

PEKEBUN MODEN… Jeffery mandangka buah semangka tasik ditanam iya nengah sistem fertigasyen.

“Pengudah mansutka asil pengelama dua ngagai tiga bulan, baru aku nanam baru chabi nya.

“Chara nanam terung enggau chabi nyau deka sebaka tang bida iya terung jampat agi mansutka asil, kira tiga bulan udah tau dijual.

“Enti nanam semangka tasik nya pen sama tang semangka nya jampat agi bebuah lalu ulih dijual pengudah dua bulan lebih aja.

“Enti baka chabi nya, lama mansutka asil tang pengudah mansau, ninting hari mih ngambi buah iya, sama baka terung.

“Reti iya, ninting hari bisi asil belama tang buah semangka tasik nya, bebuah sekali aja tang pun semangka tasik nya deka dibunuh sebedau ditanam baru,” ku Jeffery nerang.

Kelimpah ari nya, Jeffery madahka iya kala nerima kereban kena bekebun ari Opis Betanam Betupi Sibu.

 

CHARA FERTIGASYEN… Jeffery nanam semua sayur enggau buah nya ngena chara fertigasyen magang.

BERITA LAIN

BERITA TERBARU