Jerukan Atap: Ngayu idup menyana

BETONG: Jalai pengidup bansa Dayak Iban endang belalauka adat ti ditampung kenyau ari menya.

Adat tu ukai semina nyadika lalau enggau tenggau ba pengidup tang mega chara dikena kitai ngidupka diri.

Nya kebuah bisi jaku tuai nyebut, bejalai betungkatka adat, tinduk bepanggalka pengingat.

Kenu ku peranak asal Rumah Henry Jawan di Serudit A ditu, John Adam Gilbert, sebagi ari adat agi dikemeran sida adap menua Betong iya nya Jerukan Atap.

Adat tu ku John, iya nya adat pemeri ngagai anak mit ti bedau tumbuh ngeli maya terubah iya nemuai tauka tama ngagai bilik kitai.

NGASIKA AJAR TUAI… John Adam Gilbert

“Mayuh menua ngumbai adat tu Jerukan Atap, lalu bisi mega sekeda madah Sukan Atap, tang adap kami ke Betong ngelar iya Telenga Atap.

“Utai ti suah diberi orang ngempu bilik ngagai anak mit nya baka berau, gula, garam, mata duit enggau pinggai sesingkap sereta papung besi tauka paku lawang.

“Genap pemeri tu mega bisi reti enggau sampi ti ngayuka pendiau anak mit nya dataika besai jemah,” ku John ngelansa.

Nambah nya ku iya, pemeri adat tu mega nitihka penyiru enggau pemisi orang ke ngempu bilik sereta nadai ditatak.

Baka udah disebut iya dulu tadi, utai ke diberi kitai jeman diatu enggau dulu menya mega bisi bida nitihka singkang pemansang tang agi ngemeratka utai ti enda tau enda bisi baka berau.

KENA BERIDUP… Pinggai sesingkap kelai anak mit deka angkun mela diri sereta bebasaka utai dikena beridup.

Kebuah pia ku iya, laban berau tu tau dikumbai pun pengidup kitai bansa kenyau ari kelia lalu tu mega tanda basa ngagai indu padi.

“Utai ke suah diberi kitai iya nya pinggai tauka chapak sesingkap lalu dibekalka kitai enggau berau.

“Pemeri mata duit nadai ngira pemayuh lalu nitihka penyiru enggau pemisi orang ke ngempu bilik nyadika kering semengat.

“Pala iya lalu ditata ngena minyak sereta disugu ngambika iya gayu guru enggau gerai nyamai nguan menua sereta nadai sakit lengit.

“Mulut anak mit mega tau disapi tauka dichulikka garam mimit awakka iya landik sereta pintar bejaku lalu ngasi didinga orang mayuh.

PENATAI DIBASA… Anak mit terubah dibai apai indai sida nemuai deka diberi adat Jerukan Atap

“Udah nya iya lalu disampika kitai diau lantang senang, bulih pengidup meruan, pandai ba pelajar sekula sereta nyadi mensia ti menyana jemah,” ku John ngelansa silik.

Ku iya, nya baru kitai dikumbai orang bisi sereta nemu adat enggau orang ke datai nemuai.

Kelimpah ari nya, enti anak mit bisi dibai indai iya terubah nemuai tauka tama ngagai bilik kaban belayan tauka bilik orang bukai, kitai ke nemu adat sigi lalu nata pala anak mit nya enggau minyak angi tauka minyak buk.

“Enti sema nadai minyak angi tauka minyak buk, minyak nyiur pan tau dikena.

“Ketungkah anak mit nya deka dibai apai indai iya pulai ari bilik orang nya, dia orang ti ngempu bilik nya lalu meri anak mit nya pinggai tauka chapak sesingkap.

“Enti nadai pinggai tauka chapak diberi kitai ke ngempu bilik, gelas tauka mangkuk siti pan nyadi mih, nitihka penti pemali adat tu tadi.

“Suah mega orang nyuaka pemeri mata duit lalu diasuh genggam anak mit nya,” ku iya nandu.

Nyadi tuju meri anak mit nya adat Jerukan Atap ku penemu enggau pengarap tuai kitai Iban iya nya ngambika iya gerai nyamai lalu bidik landik teulihka reta tengkira maya udah besai jemah.

Tambah mega ku John, tu mandangka orang bempu bilik bisi bendar pengaga enggau pengangkun ke anak mit nya tama ke bilik sida.

“Munyi ku disebut aku terubah tadi, adat tu mengkang dikemeran sekeda orang ti ingatka utai tu lalu ukai semina ba raban bansa kitai Iban aja, tang bisi meda dikemeran sekeda bansa bukai.

“Tu nyengkaum bansa Melayu enggau China lebuh nerima penatai tauka penemuai keterubah anak mit bansa kitai Iban, sida mega bisi nyuaka pemeri ketegal penyiru,” ku John temegah nampung adat nya.

John ngarapka bala nembiak rebak baru bulih pelajar ari adat baka tu lalu nemu berunding dalam agi sereta nemu reti adat basa ngagai bala temuai nadai ngira umur.

“Aku mega arapka adat lama baka tu ulih mai kitai mereti enggau bebasaka pangan diri dikena ngemansangka bansa, nemu berserakup dalam semua pengawa sereta maju ba pengidup.

“Kitai Iban amat berani sereta kering ati, tang pemerani enggau pengering kitai patut dikena ba pemansang bansa kitai empu lalu ukai kena munaska bansa enggau adat diri.

“Laban kitai bansa Iban udah tebilang nama munyi ku sempama, Dikelala buah ari langgu, dikelala basa ari penyiru, dikelala bansa ari jaku,” ku John nyimpul randau enggau Suara Sarawak.

Suara Sarawak