KUCHING: Naka 26 March Opis Kampung Sarawak (JHS) udah nanam 3.15 juta tapang kayu sereta nyadi nengeri ba penuduk pemadu atas di Malaysia ngemujurka Kimpin Malaysia Gadung.
Direktor JHS Datuk Hamden Mohammad madahka Perintah Besai nengah Opis Menteri Tenaga enggau Pengeraja Asal (KeTSA) udah ngelancharka kimpin tu kena 5 Januari 2021.
“Kimpin tu ngembuan juluk nanam 100 juta paung kayu ba selampur menua nyerumba taun 2025 tu ila.
“Nengeri Sarawak nagit 35 juta paung kayu ulih ditanam datai ngagai taun 2025 ke alai ninting taun kitai nagit nanam 7 juta tapang kayu,” ku iya.
Hamden bejaku munyi nya rambau Program Hari Kampung Sedunya Renggat Nengeri Sarawak 2021 di Taman Tasik Bukit Siol DBKU ditu, kemari.
Ku iya, taun tu Perintah Besai udah ngagihka RM4 juta belanja dalam ngemujurka kimpin tu.
“Kelimpah ari nya, Perintah Nengeri mega udah ngemendarka agih belanja pemansang penyampau RM10 juta enggau agih belanja ari tabung Cess kampung penyampau RM2.5 juta bagi Program Sarawak Gadung.
“Mayuh bansa paung kayu baka kapur bukit, engkabang jantong enggau ke bukai udah ditanam.
“JHS mega ngaul kerejasama enggau ejensi peribit sereta gerempung ukai dikuasa perintah (NGO) lebuh bejalaika program nya,” ku iya.
