JKKK deka bisi enam kali baum

SPAOH: Semua genturung pendiau ti bisi numbuhka Komiti Pengatur enggau Pemansang Genturung Pendiau (JKKK) di menua tu, dipelaba deka bisi ngatur enam bengkah aum bepun taun tu.

Sapit Kepala Menteri Datuk Amar Douglas Uggah Embas madahka aum tu dikena nentuka JKKK di menua tu bejalai enggau efektif dalam meri servis ngagai rayat.

“Kepala Menteri Datuk Patinggi Abang Abdul Rahman Johari Tun Openg udah ngagaihka RM100 juta dikena negapka JKKK di menua tu.

“Tu mandangka Perintah Sarawak meri basa ti penuh ngagai sida ti megai tanggungpengawa ti beguna ba JKKK,” ku iya.

Iya bejaku munyi nya ba pengawa nyuaka geran penyampau RM240,000 ngagai 22 komiti raban bansa enggau surau ditu, kemari.

Tandu Uggah, semua sekretari JKKK deka dibayar elaun RM300 ninting bulan.

“Tiap 15 iku raban JKKK ti datai maya aum deka dibayar RM50 siku lalu ungkus pemakai RM100 deka diberi,” ku iya.

Nangkan nya, iya madahka maya aum ti dipejalai ke sida patut ngemeratka pekara ti manah dikena negapka pengelantang pendiau enggau pengelikun genturung pendiau.

“Ambika chunto, mayuh program enggau aktiviti baka sektor betanam betupi enggau produk nyendia pemakai kediatu ti relevan dikereja sida.

“Kelimpah belajar, sida ulih muka peluang dikena nambahka penatai pemisi ruang bilik,” ku iya.

Sama bisi datai Pemesai Pelilih Menua Betong Sohfi Jebal.