JKKK lebih ngasi dibanding MPKKP

KUCHING: Perintah Sarawak pintar nagang Komiti Pengatur Komuniti Genturung Pendiau Perintah Besai (MPKKP) ba menua tu lebuh nyendiaka agih belanja RM100 juta ungkup Komiti Pemansang enggau Pengelikun Genturung Pendiau (JKKK).

Lo Khere Chiang (GPS-Batu Kitang) madah, Sarawak enda ibuh bejaku tauka betimbal penemu ba media rama dikena ngenegapka agi JKKK nentuka komiti nya mengkang ngasi enggau engkeman dataika dudi hari.

Ku Khere Chiang, agih belanja RM100 juta dikena ngenegapka agi pejalai JKKK tu chara pemadu manah ari Perintah Sarawak dipegai Kepala Menteri Datuk Patinggi Abang Johari Tun Openg.

“Tu chara pemadu manah ungkup Perintah Sarawak lalu Abang Johari mantaika RM100 juta dikena nyeliah kitai betimbal jaku enggau Perintah Besai kelimpah ngenegapka agi pejalai JKKK ba menua tu,” ku iya nyemetak madah.

Khere Chiang mansutka jaku nya lebuh ngelansa pasal agih belanja RM100 juta ti dipejurai Abang Johari dalam Bajet Nengeri Sarawak 2020, ditu pagi tadi.