BETONG: Komiti Pengelikun enggau Pemansang Genturung Pendiau (JKKK) nyadika kuta kepenudi nagang pengerekai igi penyakit Covid-19 lalu orang luar ke datai ke rumah panjai tauka genturung pendiau sida patut nulis nama sebaka enggau atur ke dipejalai ba kedai-kedai besai.
Sapit Kepala Menteri Datuk Amar Douglas Uggah Embas madah, pemar ditapi bejalaika atur nyaga takah enggau pangan diri lebuh maya pengerami melah pinang, penusah rabat enggau ke bukai ba genturung pendiau tauka rumah panjai.
“Nyadi, kitai maya dela begelumu ngujungka atur nyaga takah enggau pangan diri pedis deka dititih.
“Barang sapa aja datai nemuai ngagai rumah panjai tauka genturung pendiau patut nulis nama enggau lumur telefon ba JKKK. Tu beguna laban dikena ngemuntang pengawa nyidi sida ti bisi kena rampit penyakit Covid-19 ba genturung pendiau nya.
“Lebuh bisi pengerami tauka program ke baka nya, sigi mayuh orang datai…bisi nya ari luar, ari genturung pendiau ke besemak sereta enda temu ari ni penatai.
“Aku setuju enggau buah penemu Adun Layar Gerald Rentap Jabu ti ngasuh semua JKKK bejalaika atur nya,” ku iya.
Iya mega Direktor Komiti Penyangga Penusah Ngenyit Sarawak madah munyi nya lebuh bejadika Pengawa Ngelancar Bengkel Polis Komuniti JKKK Pelilih Betong Di Dewan Sukan Tan Sri Datuk Amar Stephen Kalong Ningkan, kemari.
Ku iya, pengawa nya majak muntang laban udah bisi aplikasyen baka MySejahtera.
Kelimpah nya, iya ngelalau JKKK patut betati ngagai orang luar ke deka datai ke rumah panjai kelebih agi sida ke ba garis entara menua.
“Berindik enggau nya, titih meh atur Atur Pengawa Standard (SOP) ditetapka Perintah Besai,” ku iya.
Tandu iya, ukai semina betatika pengerekai igi penyakit Covid-19, JKKK mega patut bejaga ari utai bukai baka pengawa beambika dadah, denggi, rabies enggau pengawa ngerembaika berita bula.
“Nya alai dalam Bajet Sarawak 2020, JKKK diberi agih belanja RM100 juta dikena mantu perintah ngemansangka genturung pendiau diri.
“Pia mega, aku ngarapka semua kaban JKKK betatika penemu ari Bengkel Polis Komuniti ke udah diatur sehari,” ku iya.
Penyampau 23 sesi Bengkel Polis Komuniti ti ngaul 660 JKKK enggau 3,300 raban deka dipejalaika di semua pelilih enggau pelilih mit di Betong nyentuk 17 Oktober ila.
