JKM nadai kala nyiri ejen gawa

KUCHING: Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka Opis Pengintu Pengelantang Mensia Mayuh (JKM) nadai kala nyiri sebarang orang tauka serakup nyadi ejen bejalaika servis opis nya.

Ku iya, ulah sekeda raban nadai tanggungpengawa ba sekeda menua di Sarawak ti ngumbai diri ejen ari JKM ngelawa rumah siku-siku lalu minta penerang diri enggau tuju ngintu pengelantang tang semina deka nipu aja.

“Kitai nerima sebana bisi sekeda komuniti udah ditipu orang ti nyaru diri nyadi ejen JKM.

“Aku deka nyemetak madah ke alai JKM nadai kala nyiri sebarang orang tauka serakup nyadi ejen ngintu pengelantang.

“Raban ti bisi dipeda kita semina volunteer aja lalu sida tu nadai dibayar gaji,” ku iya lebuh bejaku ba Pengawa Nyuaka Tanda Basa Volunteer JKM enggau Ngaku Bakih Strategik JKM, malam ensanus.

DIPEBASA… Fatimah mantaika lambing baru Gerempung Volunteer Ngintu Pengelantang.

Ku Fatimah nerang, enti sema bisi orang datai ngaku diri ulih mantu lalu minta penerang diri baka tingki enggau kad bank, reti iya sida tu semina deka nipu lalu ukai mantu.

“Anang enda bejimat lalu pendingka jaku lalau aku ngagai semua kita lalu aku dekaka semua volunteer ulih ngerembaika pekara tu kelebih agi pasal kitai nadai matih ejen ngintu pengelantang.

“Enti deka ngaduka pengawa enggau piak JKM patut datai ba opis kitai tauka raban volunteer ti rejista,” ku iya nerang silik.

Tambah mega belalauka statistik opis nyentuk diatu sepenyampau 2,150 volunteer chakah ngatur pengawa di Sarawak ti datai ari 12 bagi menua kelimpah 241 ungkup Homehelp Service sereta 110 pengari servis ngintu pengelantang.

Ba lansa sama ku Fatimah, sebagi ari empat batang jurai kabinet ti udah dibantai rambau aum kunsil nengeri (Dun) ngaul Skim Elawin Servis Volunteer Ngintu Pengelantang dikena beratika semua kes bantu wang ungkup pengelantang.

“Tu dikena beratka semua kes bantu wang ungkup pengelantang ke alai jurai dibantai minta pemendar kaban kunsil nengeri laban tu ngaul pekara belanja.

“Piak JKM Sarawak mega ulih numbuhka siti skim elawin wang ngagai raban volunteer ngintu pengelantang ti dipadu gawa beratika kes bantu wang ninting bulan enggau bejalaika skim tu berengkah ari June taun tu,” ku iya nerang silik.

Berebak enggau nya, tanda basa mega diberi ngagai sekeda volunteer ari jasa sida sepanjai bejalaika servis.

Lambang baru Gerempung Volunteer Ngintu Pengelantang mega dibantai beserimbai enggau pengawa sehari nya nyengkaum nyuaka baju vest ngagai pengari 12 bagi menua di Sarawak.

Sama datai Menteri Muda Pengelantang Komuniti, Datuk Francis Harden Hollis, Menteri Muda Orang Indu, Ruang Bilik enggau Pemansang Anak Mit Rosey Yunus enggau Sekretari Mendam Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Dr. Saadiah Abdul Samad.

Bala bukai nyengkaim Direktor Bagi Pekara Komuniti JKM Malaysia Nor Tipah Majin, Residen Bagi Menua Kuching Sherrina Hussaini, Residen Bagi Menua Samarahan Brahim Lumpu enggau bala direktor, pengari ejensi perintah sereta Bakih Strategik JKM Sarawak.