KUCHING: Siku anak Iban asal ari Betong, John Watson Tamin Willie Rimong mujur menggi gelar champion ba Pekit Mister Heritage International 2023 ti diatur ba Filipina kena 29 April tu tadi.
Ba pekit nya, John ti ngarika menua Malaysia mujur ngalahka 30 penyereta bukai ti datai ari serata dunya.
Berebak ari penyulut nya, iya mujur mai pulai perais mata duit US$5,000, jumpang enggau selampai.
Ukai naka nya aja, John bela bulih anugerah bukai nyengkaum Anugerah Pintar Niu Jaku (Best Spokerperson), Anugerah Personaliti Pemadu Manah (Best Personality) enggau Anugerah Narit Ati Akim (Best Grand Arrival).
Nengah pemujur nya, John udah ngemegahka Malaysia kelebih agi Sarawak sereta mandangka pengaya main asal enggau penyelai ngepan bansa Iban ba tikas antarabansa.
Penyereta ari India, Banner Lenamai mujur menggi penuduk kedua lalu penuduk ketiga dipenggi penyereta ari Jipun, Masanobu Huchihashi.
Ngelansa senentang penyulut nya, John madahka diri berasai gaga sereta temegah ati laban udah ngarika Malaysia kelebih agi Sarawak ba pekit antarabansa nya.
“Aku chukup gaga sereta temegah laban diberi pengandal ati ngarika Malaysia kelebih agi Sarawak ba pekit antarabansa kelimpah ulih nyaguka main asal Iban ba mata dunya.
“Pia mega, aku berasai sinu laban sekumbang timpuh bepekit tu, aku ngena duit belanja diri empu lalu nadai nerima sebarang belanja tauka bantu mata duit ari perintah.
“Nya alai, aku ngarap dudi hari, perintah betatika pekara tu dikena nyukung pengari menua diri dikena ngangkatka nama Malaysia enggau Sarawak ba tikas dunya,” ku iya.
Ungkup rikod, John ti ngarika Borneo kala bulih penuduk keempat ba Pekit Mister Glam International 2022 ti bela diatur ba Filipina ba bulan November taun tu kemari.
Penanyi, pelakun, model, pengelicha motivasyen nya mega kala dipadu nyadi Keling Gawai Dayak Renggat Menua Sarawak 2022, Mister Elegent Sarawak 2019 enggau mayuh agi ti bukai.
Mister Heritage International 2023 nya mega chakah nyukung United Nations International Children’s Emergency Fund (Unicef), sebengkah gerempung ti ngintu enggau negika hak nembiak mit ba serata dunya.
Nya alai, pemujur John nya ukai semina mai nama menua ba panggau dunya tang udah narit ati mensia mayuh ba serata dunya rindu meda pengaya enggau penyelai pekayan asal kitai Iban.
Besai pengandal kitai bisi rebak biak ulih nampung pengelandik enggau pengepuh John nyaguka pesaka bansa kitai Iban ngambi majak dikelala dunya.
