ARTIKEL

Josh Lee profesional nyapai juluk nyadi artis

Facebook
Twitter
LinkedIn
WhatsApp
Telegram

BEREKAT ari peransang bala bakih enggau diri sebilik sereta minat ti besai ba pengawa belagu, Joshua Anggoh Lee mujur begelar artis.

Sida temegah meda penau enggau pemanah sada nyawa iya belagu lalu meransang iya ngerikod lagu diri.

Lebuh nusui peneleba diri, iya ti tampak agi dikelala Josh Lee madah, keterubah suba iya nadai pengandal ati deka ngerikod enggau ngeluar lagu diri taja udah bisi nyimpan minat.

Tambah mega, ku iya, pangku pengawa enggau pengiruh nyadi pengajar ngasuh iya agi kakang ati deka ngerikod enggau ngeluar lagu laban nangi enda ulih magi awak diri.

“Pengudah meda mayuh bala bakih sama ngajar terejun ba industri muzik Iban kelimpah ari peransang bala bakih enggau diri sebilik, dia aku mutus ati nyingkangka kaki ba dunya pemerindang tu,” ku Josh Lee.

MUTUS ATI
Ba taun 2022 rambau raun ke Miri, iya tebuka ati deka ngeluar lagu single keterubah lalu mantaika juluk nya ngagai siku komposer bepenau, Jonez Mackean.

Pengudah kerejasama enggau Jonez sereta siku pengatur muzik, Jumpull Mordoc, Josh Lee mujur ngeluarka lagu single keterubah ti pejuluk Padam ba bulan September 2022.

Lagu berentak balada nya dikeluar ba baruh perabung serikat Kaban Music Production (KMP).

Nengah kerejasama Jonez enggau Jumpull mega, ba bulan June tu tadi, iya mujur ngeluarka lagu singke kedua berentak remix pejuluk Lelengau Atiku bela ba baruh perabung KMP.

Penanyi sigat nya ngarap kededua lagu single nya enggau lagu iya ti deka datai dudi hari nerima timbal manah ari semua orang kelebih agi peminat lagu Iban.

JULUK BESAI
Iya mega ngarapka diri ulih masuk pekit tauka anugerah industri muzik Iban baka Anugerah Charta Sapa Juara (ACSJ) ngambi majak dikelala sereta ngulih peneleba ba pengawa belagu.

“Aku ngarap dudi hari ulih bekerejasama enggau bala komposer sereta pengatur muzik tebilang ti bukai baka Hairee Francis enggau Ramles Walter.

“Ngarap industri muzik Iban majak dikelala enggau diterima semua orang ukai semina ba Sarawak aja tang ba selampur Sabah enggau Semenanjung Malaysia sereta menua luar.

“Ngambi industri muzik Iban diaku menua luar baka kitai ti ngaku industri muzik Kpop, Bollywood enggau rentak muzik ari menua Thailand,” terang iya.

Josh Lee madah, diatu mayuh pemekuh industri muzik Iban ngembuan pengulih besai ngasilka lagu bekualiti seraris segang pemansang enggau teknologi moden kemaya hari.

MINAT BELAGU
Minat Josh Lee ba pengawa belagu endang dikembuan iya rambau agi sekula sekondari lalu berebak enggau nya, iya suah ngambi bagi ba mayuh pekit belagu ti bisi diatur ba sekula.

Lebuh nampung pelajar diri ba Palan Pematih Pengajar (IPG) ba Pulau Pinang, iya mega suah dikangau merindang ba dalam enggau luar kampus.

Lebih ngemegah, ku Josh Lee, iya enggau sekeda bala bakih kala dikangau merindang rambau Pengerami Ngintu Hari Pengada Tuai Pemegai Menua (TYT) Pulau Pinang.

“Nya meh siti ari kenang manis enggau pemadu berega ba aku lebuh diberi basa merindang ba Hari Pengada TYT Pulau Pinang,” ku iya.

Anak pengkuan ari dua menyadi nya bela ngambi bagi ba Pekit Belagu Battle of the Band (BoB) ti diatur ba Pulau Pinang lalu iya nyadi vokalis Borneoz Band.

Ukai naka nya aja, rambau nampung pelajar ba IPG nya, Josh Lee ransing cover lagu sereta dikunsika nya ba pelasar YouTube Collabr8.

Diatu, kelimpah ari ransing merindang bala peminat, iya suah diberi basa nyadi akim ungkup bemacham pekit belagu ba sekula selampur Simunjan enggau Serian.

TIKAS PELAJAR
Ngelansa senentang tikas pelajar, Josh Lee belajar ba Sekula Primari (SK) St Augustine, Bintangor sebedau nampung pelajar ngagai Sekula Sekondari (SMK) Kai Chung, Bintangor.

Udah nya, iya nampung pelajar pelajar ba IPG Kampus Tuanku Bainun, Pulai Pinang pengelama lima taun seraya ngambi Kus Pelajar TESL enggau Sains.

Pengudah tembu belajar, Josh Lee dianjung gawa ba sebuah sekula primari ba pelilih Simunjan berengkah ari taun 2016 nyentuk diatu.

Taja pen mangku pengawa nyadi pengajar tang nya enda nagang iya chakah ba pengawa merindang.

PENGUJI NGAJAR
Baka bala pengajar bukai ti ngajar ba sekula menua pesisir enggau menua ulu, udah tentu Pengajar Josh Lee mega napi penanggul sebaka.

Taja napi bemacham pemar enggau penanggul sekumbang ngajar ba sekula nya tang nya enda nagang iya terus nabur jasa ngagai komuniti diri.

Sekeda ari pemar ditapi sida sebuat ba sekula nya baka napi bekal kuasa karan ti suah tejanggal, gaya jalai ti sempit enggau enda meruan nuju sekula nya sereta penanggul bungkur internet.

“Semua penanggul nya enda muntanka semangat aku ngajar bala nembiak ba sekula tu.

“Naka ulih meh aku gawa enggau manah ngambi enda ngelebu pengadang apai indai nembiak ti ngelempai pengandal ati ngagai kami pengajar ti ngajar anak sida.

“Penanggul, pemedis enggau pemerinsa nya meh ngasuh aku ransing ngajar sida sereta meri tunga kuing ti tampak ngagai sida dudi hari dikena ngubah pengidup sida enggau ruang bilik sida.

“Lebuh ujung minggu, aku suah mai bala nembiak pulai ke Kuching dikena ngelantang ati enggau muai penusut runding sida pengudah besekula kelimpah meri sida peneleba baru.

“Amat meh ulah tu dipeda nadai nama-nama tang ulih meri motivasyen enggau peransang ngagai sida ngambi ransing agi belajar,” terang iya.

AJAR NUJU REBAK BARU
Kemaya hari tu, ku iya, pelajar beguna amat dikena ngubah tunga kuing sereta status nembiak enggau ruang bilik sida jemah.

“Nya alai, belajar bebendar enggau naka ulih kita lalu anang malu betanya enti enda meretika topik dipelajar.

“Sinu meh ngagai apai indai ti ngelempai pengandal ati ti besai ngagai kita dikena ngubah status ruang bilik kita.

“Enti ukai kita, sapa agi orang dikeandal sida? Anang sesekali ngelebu enggau munaska pengandal ati apai indai ngagai kita.

“Keingat mega pemedis apai indai kita ngiga belanja dikena nyengula kita. Enti kita udah besai jemah, balas meh pemanah budi apai indai kita.

“Beli meh utai dikedeka tauka dikerindu sida, bai sida raun ngelantang ati ngambi sida temegah ngempu anak baka kita jemah,” ku lalau Josh Lee.

PINTAR MAGI AWAK
Pengiruh enggau pengepuh gawa enda nagang Josh Lee nerus minat diri ba pengawa belagu sereta merindang baka peminat.

Iya madahka diri enda nyampur entara minat enggau kereja ngambi semampai profesional ba semua pengawa dikereja.

“Aku nemu pangku pengawa nyadi pengajar endang berat tang aku mega patut pintar magi awak diri dikena ngemujurka minat diri belagu.

“Lebuh bejalaika pengawa (ngajar), aku sigi beamat-amat sereta naka ulih nembu kereja diri ngambi lebuh ujung minggu aku ulih bejalaika pengawa merindang,” ku iya.

Ba luar pengawa ngajar, iya sigi ransing ngulih mayuh penemu enggau peneleba ba pengawa belagu.

Josh Lee madah, penatai mayuh bala artis baru ngerichahka agi industri muzik Iban sereta meri semekih besai ngagai bala artis.

Iya semampai tebuka sereta sanggup bekunsi penemu sereta peneleba enggau pangan diri laban iya pechaya enti semua artis Iban ngemerat ulah baka nya, dia sida ulih begulai ngangkat industri nya ngagai tikas ti tinggi agi.

PROFESIONAL… Josh Lee pintar magi awak diri entara bejalaika pangku pengawa diri nyadi pengajar enggau nerus minat belagu.
RANSING NGAJAR… Taja napi bemacham pemar enggau penanggul ngajar ba sekula menua pesisir tang nya enda muntanka niat Josh Lee ngajar nembiak sekula dia.
ENDA AMU PENEMU… Josh Lee rindu bekunsi penemu enggau peneleba dikena ngangkat industri muzik Iban.

LAIN-LAIN BERITA

Sarawak ngulit dua hari

KUCHING: Perintah Sarawak ngemendarka timpuh ngulit selampur nengeri pengelama dua hari, belabuh sehari tu enggau pagila. Nambah ke nya, tambai mega digitang tengan tiang aja

TYT berami enggau YAST Group

KUCHING: Tuai Pemegai Menua (TYT) Sarawak, Tun Wan Junaidi Tuanku Jaafar enggau bini iya, Toh Puan Fauziah Mohd Sanusi udah ngulu Pengerami Makai Lemai Taun

Mutang aruh iya dichiri mangku pengawa

LIMBANG: Pengawa nyiri ex-Kaban Parlimen Bukit Mas, Datuk Mutang Tagal nyadi Yang Dipertua Dewan Negara ke-20 endang meri besai pengandal. Sapit Premier Sarawak, Datuk Amar

BERITA TERBARU

Tun Taib bawa pembangunan berterusan

KUCHING: Hubungan rapat antara Kerajaan Persekutuan dan Kerajaan Sarawak yang terjalin rapat sejak pentadbiran bekas Yang di-Pertua Negeri Tun Pehin Sri Abdul Taib Mahmud membawa

Legasi ditinggalkan Tun Taib tidak ternilai 

KUALA LUMPUR: Legasi yang ditinggalkan oleh Allahyarham Tun Abdul Taib Mahmud sebagai Bapa Pemodenan Sarawak tidak ternilai dan akan sentiasa hidup di dalam hati semua.