JPBBS begunaka langgur penemu ari mensia mayuh

SIBU: Kordinator Komiti Penyangga Penusah Bagi Menua Sibu (JPBBS) Dr Annuar Rapaee meransang mensia mayuh mantaika penemu sida bekaul pengawa nagang kes Covid-19 di Sibu ke majak nambah nya.

Dr Annuar madahka bemacham inisiatif udah dipejalai dikena nagang pandemik nya kenyau ari bulan Januari tu tadi beduduk ari pengerekai Kluster Pasai.

“Tang kes ba Sibu agi tinggi lalu nadai mantaika kelai kes nya deka kurang.

“Atur Mindah Betagang (PKP), Atur Mindah Betagang Belebas (PKPB) enggau Atur Mindah Betagang Khas (PKPK) pen udah dipejalai diatu.

“Enti deka bejalaika PKP, JPBBS beratika mayuh empas laban meri pangka ngagai ekonomi enggau rayat ditu empu.

“Nya kebuah, aku nadai penanggul nyema kita ulih mantaika chara dikena nagang pandemik tu.

“Aku semampai mendingka penemu kita ungkup pengelikun kitai ba Sibu tu,” ku Dr Annuar.

Dr Annuar mansutka jaku nya lebuh mantaika penerang kes positif Covid-19 Pelilih Sibu, malam Hari Tiga tu tadi.
Menteri Muda Kaunsil Kandang Menua enggau Pengawa Berumah nya madah engka JPBBS deka ngenyit bejalaika sebengkah pekara pasal pemutus nagang pengerekai Covid-19 ke majak nambah nya.

“Enti kes Covid-19 di Sibu agi ngirauka ati, kitai nadai pilih bukai kelimpah ari neritka agi atur nya ngambi nagang pandemik Covid-19 tu.

“Kami nemu mayuh orang enggai napi penusah ketegal pekara tu, nya kebuah kita mesti besaup berundingka chara pemadu manah nagang pandemik di Sibu tu,” ku Menteri Muda Pelajar, Sains enggau Pansik Teknologi nya.

Ku Dr Annuar, sebedau iya udah bekerejasama enggau semua orang nyengkaum pengari rayat ba Sibu ari penemu politik ti bebida ngambi berundingka chara pemadu manah nagang pengerekai igi penyakit Covid-19 di Sibu lebuh mantaika penemu sida ngagai iya.

“Kami bekerejasama rat ungkup pengelikun di Sibu taja ari parti ti bebida. Nya kebuah, aku meransang peranak Sibu bela mantaika penemu kita ngagai aku,” ku Adun Nangka nya.

Lebuh bejaku pasal kes Covid-19 di Sibu, iya madahka kes Covid-19 udah bisi magang di semua kandang menua Sibu.

Berindik ari nya, iya ngelalau mensia mayuh anang guai ngusung kaban belayan ba ‘tumpuk angat’ ti udah ditukuka sebedau tu.

“Tebal agi, kes Covid-19 ba Sibu nya kes berampit dalam komuniti ditu empu. Ukai baka di Bintulu ke alai kes mayuh datai ari orang luar ti bejalai ke Bintulu.

“Nya alai, kitai napi pemar nitihka Atur Pengawa Standard (SOP) baka ba Bintulu laban kes Covid-19 ditu datai ari kes berampit dalam komuniti,” ku iya nyemetak madah.

Sibu ngerikod 311 kes ti digumpul pengelama empat hari ke udah ke alai kena Hari Tiga tu tadi, Pelilih Sibu ngerikod 133 kes.

Nangkan nya kena Hari Tiga tu tadi, Komiti Penyangga Penusah Nengeri (JPBN) udah ngenukuka siti kluster baru di Sibu iya nya Kluster Tanjong Kibong ke alai kluster tu ditemu ba endur gawa ba sebuah serikat miki kapal ba Tanjung Kibong ditu.

Suara Sarawak