KUCHING: Opis Meteorologi Malaysia (MetMalaysia) melaba enam renggat ujan bangat deka nyadi ba Sarawak sepemanjai timpuh Monsun Timur Laut (MTL) tauka Musin Landas ti belabuh November tu nyentuk March taun baru.
Chairman Komiti Penyangga Penusah Nengeri Sarawak (JPBNS), Datuk Amar Douglas Uggah Embas madah, sida udah ngatur siti aum ti berandauka penyikap napi musin pengujan ba menua tu.
Ku iya, ari sukut aset lojistik sereta penyampau pengereja pengawa, JPBNS nengah ejensi kereja begulai enggau Polis DiRaja Malaysia (PDRM), Opis Bomba enggau Penyah Penusah Malaysia (JBPM) enggau Raban Nyaga Orang Periman Malaysia (JPAM).
“Bisi 5,501 pengereja pengawa dibantu mayuh aset lojistik baka 487 aset darat, 249 aset tasik enggau sungai, 12 aset langit sereta 207 aset sukung ke bukai.
“Aset nya enggau pengereja pengawa deka seruran sedia napi musin landas tu,” ku iya ba sebengkah penerang kemari.
Uggah madah baru, Sarawak ngerikod 154 endur ti seruran ampuh bah ba taun tu.
Nya alai, 70 bot fiber udah diagih ngagai semua bagi menua dikena mindah sida ti engka bisi tasah ketegal penusah ampuh bah.
