KUCHING: Raban piak penerit adat patut bejalaika atur ti lebih ngasi ngagai sida ti ditemu ngereja pengawa bejudi chara ‘online’.

Kaban Kaunsil Nengeri (Adun) Tupong, Fazruddin Abdul Rahman madah, mayuh macham pekara udah dipejalaika piak penerit adat dikena nagang pengawa judi tu di Matang tang agi mengkang dikerejaka sida.

“Piak polis udah ngaga mayuh operasyen dikena ngemunaska pengawa judi tu.

“Tu nyengkaum nutup bekal karan ba kedai ti ditemu bisi bejalaika pengawa judi online tu, tang nadai insur ari operasyen nya,” ku iya.

Fazruddin madah munyi nya rambau Pengerami Ngelaluka Pengabang ti diatur di Dewan Bahasa dan Pustaka ditu, kemari.

Nya alai, ku iya, piak penerit ada lebih agi piak penerit kandang menua (PBT) patut ngiga jalai ti lebih ngasi sereta jampat dikena mutarka pekara nya.

“Tu ukai pekara ti baru nyadi ba menua Matang, tang suah endar udah ditemu.

“Ukai semina ngagai bala penerit adat, tang mega mensia mayuh diperansang sama ngeripot pengawa bejudi tu ngagai polis ngambika ulih dipansik,” ku iya.

Iya mega nangkan enggau jaku lalau, mensia mayuh enda patut takutka sida tu laban sida tu mih ti mai penyai sereta ngemunaska komuniti ti beresi.