KUCHING: Nyentukka diatu judi ‘online’ sempama baka ‘penyakit’ ti enda ulih diperubat ngagai bala komuniti ti sanggup masau awak enggau duit ninting hari ngambika bulih penguntung jampat.
Apin lama ke udah, Kaban Kaunsil Nengeri (Adun) Tupong, Fazzrudin Abdul Rahman lebuh dirandau media madahka piak perintah deka seruran ngiga chara nagang penyalah judi online ari terus nyadi kelimpah seruran bekerejasama enggau piak penerit adat lebuh bejalaika pengawa mansik penyalah tu.
Azbulah Ali, 42, madahka pekara tu patut dipunaska ari pun.
“Judi online tu patut dipunaska jampat ngambika penyalah tu enda nyadi penyakit ti enda ulih diperubat.
“Kitai patut ngemunaska judi online diatu laban penguna kelalu mudah ngulihka aplikasyen permainan tu dalam online kelimpah judi online tu ulih dikereja belalai,” ku iya.
Niel Ashley Atila 25 madah, pemun judi online tu patut ditagang dikena nyeliahka penyalah tu ari majak nyadi.
“Pemun judi online tu patut ditagang laban ulih ngasuh tiap iku sida ti mungkur dalam penyalah tu ruak ngena belanja enggau ngerugika diri lalu aku suah meda pemain bemain ba kedai tauka sitak ti ngembuan internet pechuma,” ku iya
Kenny Polycarp 40 madah, piak perintah patut neritka agi undang-undang judi ke diatu.
“Perintah meseti neritka agi undang-undang ke diatu lebuh meri ukum ti lebih berat ngagai pesalah judi online tu.
“Mayuh bengkah aktiviti komuniti digaga ngagai peranak dikena nagang penyalah tu nyadi ba sitak menua pesisir, ngambika sida enda mungkur dalam judi online tu,” ku iya.
Benedict Peter, 39, madah piak kedai makai deka nyendiaka interent ngagai pemain judi online tu.
“Aku setuju nyema pengawa nagang judi online kelebih agi kedai makai ti nyendiaka internet ngambika sida bemain judi online tu.
“Piak penerit adat patut narit pulai lisin kedai nya kelimpah mansik enggau silik senentang modus operandi judi online tu,” ku iya nerang.
“Piak penerit adat patut ngatur kimpin senentang penyalah judi online tu ngambi meri penyedar ngagai rebak baru,” ku Connie Grace 28.
Iya madah, ba sitak menua pesisir, pengawa matau nengah cyber enggau neritka pengawa ngena aplikasyen judi online tu patut dipejalai ngambika enda mayuh orang mungkur dalam judi online tu.
Nambahka nya, judi online tu semina masau awak enggau ngerugika orang ti gian sereta sanggup ngemasau duit ketegal deka jampat kaya, ku iya nambah.
