LUBOK ANTU: Kaban Parlimen Lubok Antu Jugah Muyang ngarapka bansa Dayak dichiri nyadi Chairman Unimas ke baru.
Iya madah, sebedau tu, chairman Unimas dipilih ari orang menua bukai balat ngasuh peranak Sarawak enda lantang ati.
“Pemutus Perintah Besai tu baka ke enda ngira orang menua tu empu. Enda patut kitai ditu ti bemacham bansa nadai penau mangku pengawa nya,” pia ku iya madah ngagai pengarang, kemari.
Iya madah, ambika banding mayuh bansa Dayak bisi pengelebih mangku pengawa nya baka Profesor Jayum Jawan, Profesor DR Ilan Mersat enggau Profesor DR Madeline Berma.
Jugah madah, Perintah Besai diatu meseti nemu rayat Sarawak bebendar deka meda hak nitihka Sempekat Malaysia1963 (MA63) dipenyadika.
“Nya alai, penemu ngambi orang luar nyadi chairman Unimas siti penemu ti ‘surut kebelakang’.
“Nama-nama sempekat ba MA63 patut dipebasa.
“Sarawak dikelala diwan pupu bansa ti ngemeranka penyerakup, bebasaka pangan diri lalu nyadika lambang pengelebih menua kitai,” ku iya.
