Julius ngaga ripot polis bekaul isu bayar elaun

KUCHING : Atlit Nyemerai Para Kebangsaan, Julius Jaranding, 33 udah ngaga ripot polis bekaul enggau elaun iya empai dibayar Institut Lumba Menua (ISN) pengelama setaun.

Enti nitihka rikod konterik enggau ISN, Julius madahka penyampau elaun ke patut dibayar tu manggai RM 72,000 tang nyentuk sehari tu apin dibayar sida.

“Dalam sempekat ke udah disain entara aku enggau ISN suba penyampau elaun ke patut diterima aku iya nya RM 4,500 lalu ditambah enggau pampas (lenyau penatai pemisi) RM 1,500 semua sekali sepenyampau RM 6,000.”

“Tang belabuh ari pun taun tu tadi aku lalu apin nerima pampas munyika udah di setujuka entara kededua piak.”

“Nya alai aku nadai chara bukai kelimpah ari mansutka penanggul aku nengah surat kabar ngicha sebana aku didinga piak ISN.”ku iya ke megai status atlit podium OKU dibaruh ISN madah ngagai pemberita, kemari.

Julius naka ulih negika hak diri lalu udah ngaga polis ba Balai Polis Sg.Maong kena 17 Dis tu tadi, ngichaka piak bekaul mansik lalu mutar penanggul ke ditapi iya.

Ungkup penemu, peranak asal Tisa Yong, Kapit tu dipilih ngarika Malaysia ba lumba nyemerai para kenyau ari taun 2013.

Udah nya, ba taun 2006 enggau 2009 iya nyereta Lumba Asia ba Kuala Lumpur lalu mujur bulih lima midul emas enggau siti midul perak. Taun tu mega dalam bulan September tu tadi, iya bisi nyereta Lumba Nyemerai Para Dunya di London tang puntan bulih sebarang midul.