KUCHING: Juluk ati urung 80 iku rayat deka ngempu rumah nyadi debu pengudah duit sida ditipu sebuah serikat ti muka skim pemeranak puku ngaga reta tanah.
Pekara nya balat ngenyinu ke ati laban tebal agi sida tu datai ari raban di menua pesisir enggau peranak rumah panjai ti disemaya danji bula ti madahka sida deka bulih pemaik baka bayar dividen enggau reta rumah.
Sekretari Besai Serakup Pekara Mensia Antarabansa Malaysia (MHO), Datuk Hishamuddin Hashim madah, serikat ti bepalan di nengeri tu muka tiga bengkah skim pemeranak puku iya nya skim ngaga rumah ba atas tanah diri empu, skim ngaga rumah ba palan bukai enggau skim pemeranak puku bepelasarka tanah enggau meri pulai dividen.
Ku iya, sida udah nerima 80 kompelin ari bala ti ditipu ari selampur Sarawak bekaul serikat nya sereta melaba urung 400 ripot ari selampur nengeri nyengkaum Kedah enggau Johor.
“Nitih penerang ti diterima kami, serikat tu udah ngasuh sida rugi penyampau urung RM50 juta.
“Sida endang nagit rayat di Sarawak, raban menua pesisir enggau orang tusah ti nyimpan juluk besai deka ngempu sebuah rumah,” ku iya.
Hishamuddin bejaku munyi nya ngagai media pengudah meri penerang tambah nengah Seksyen 112 Kanun Keseksaan Tatacara Jenayah enggau surat minta perati ngagai Kepala Polis Sarawak, Datuk Mohd Azman Ahmad Sapri ba Indu Opis Polis Kontinjen (IPK) Sarawak, ditu kemari.
Ku iya, Polis Sarawak madahka direktor serikat ti nyadi ‘master mind’ ngagai skim bula nya udah dituduh enggau dua pekara di Miri nengah Seksyen 420 Kanun Keseksaan.
Tandu iya, bisi 13 ripot agi dalam pansik enggau 18 ripot udah dibuka keretas pansik.
“Kepala Polis Sarawak Datuk Mohd Azman Ahmad Sapri madahka diri deka beratika kes tu enggau silik ngambi atur atas keretas pansik bukai ulih dibuka enggau dituduh,” ku iya.
Terang iya, sida mega deka mai kes nya ngagai Komiti Serikat Malaysia (SSM) ketegal skim ti dibuka serikat nya nadai direjister nengah Akta Skim Kepentingan 2016 nitihka Seksyen 4(2) Akta Skim Kepentingan 2016.
Iya madah, nitih pansik ti dipejalai, serikat nya udah ngaga 20 penyalah nengah Akta Skim Kepentingan 2016 ti enda direjister, enda nyiri pemegai turu, enda muka siti akaun turu enggau pemgawa muka pemeranak puku bepelasarka reta tanah ti ngujungka mensia mayuh napi pengerugi.
