Juluk ati Priscilla ngaga produk sulam eksklusif

KAPIT: Apai enggau entua indu nyadika peransang Priscilla Nyambong, 31 taun, angkun enggau mekuhka pengawa kraf jari.

Peranak asal Katibas Song nya madah, seduai nya endang orang ti nemu, teleba enggau landik begagaka macham bansa kereban enggau ngepan bansa Iban.

“Kebendar, aku tu enda kala ngulu kelas ngaga kraf jari laban suba kereja nyadi kerani ba sebuah kompeni, nadai awak endur aku limpang.

“Udah laki aku belidar gawa ke Kapit, dia aku lalu nyimpan niat nampung pengawa nyulam tu, pama mih ulih nyaup apai tuai nambahka belanja kami sebilik.

“Tambah mega apai enggau entua indu semampai meransang aku nampung pengawa asal sida ke tuai tu laban ku apai, nadai orang bukai ulih dikeandal enti ukai anak diri empu.

“Seduai iya meh ngembing aku ngereja pengawa, nadai nemu leju ngajar enggau madahka aku ni bagi utai ke patut enggau enda dikereja,” ku iya ngepunka randau begulai enggau Suara Sarawak.

PEMILIH… Baju burung, kain tating enggau selampai sulam ari Priscilla.

MURIHKA APAI

Priscilla madah, kenyau ari berangkat dara iya endang rindu ngereja pengawa pengelandik jari baka ngaga pua tampung seribu enggau betusukka manik.

Diatu iya nyau ransing endar ati begagaka kain enggau selampai sulam laban nerima timbal chukup manah bepelasarka pemayuh peminta ari mensia mayuh.

“Puji Tuhan, minat aku tu disambut manah bala mayuh, ninting hari aku bisi nerima udar ti nurai bemacham kraf jari baka kain tating, selampai enggau baju burung sereta mayuh ke bukai.

“Keranjai jari aku keterubah suba iya nya ngaga manik tango engau manik ngias butul kelebih agi butul ai tuak kitai ti disimpan dalam jemari kacha nyadika pemandang.

“Ba kraf jari sulam, selampai dipekitka aku nya meh selampai keterubah ditanda enggau disulam aku.

“Chukup tusah ditanda laban papan selampai bechura kuning, enti enda diperati silik sigi ngasuh saru. Mata alah gasak penampak chura nya.

“Taja pia aku mansal diri empu mesti ngapuska pengawa nya lalu dalam ati din betelai, enda patut orang ulih aku enda.

“Dua bulan manah endur aku nurai tauka nanda enggau nyulam selampai kuning ngangkatka ukir Bungai Kechala.

“Selampai tu meh ti disabung aku bepekit lalu mujur bulih lumur satu ba pekit diatur begulai Cc Beauty HQ enggau Keresa Kitai empai lama,” ku iya madahka pengaga diri.

NELADAN INI MELISA

Kelimpah ari apai enggau entua indu, Priscilla mega chukup rindu sereta ngining pengelandik siku ari sida serumah ti chukup landik ngereja pengawa rumah panjai.

“Chukup mayuh kami serumah din landik ngaga kraf jari lalu bisi siku orang ti pemadu meransang ati aku dikangauka kami Ini Melisa.

“Iya tu endang chukup landik betenun enggau ngaga tikai lampit, lanchat sereta sikar lebuh ngereja pengawa.

“Aku endang nyinuk enggau rindang diri lebuh nunga iya gawa ba ruai,” ku iya ngenang sekeda pengawa di rumah panjai sida din.

Pulai baru ngagai batang randau, Priscilla madahka sekeda orang deka bisi kenyap tauka mimpi dulu sebedau ngangkatka buah tauka ukir asal baka ari pua kumbu.

“Baka ajar sida ke tuai, kitai mesti beniat dulu sebedau ngambi tauka ngangkatka siti-siti ukir kelebih agi enti nya ukir asal laban mayuh penti pemali.

“Aku enggai bula, endang nadai kenyap tang meh tudah diri kala berasai tabin sereta pedis isi pengudah nanda sirat ukir mensia tauka gambar lama.

“Ukir nya suba dikunsi bala ba raban nyulam lalu dipinta orang ti ngudar enggau ngasuh aku nanda nunda ukir nya ti ngujungka aku bisi berasai nyilu isi.

“Nya meh kebuah apai aku suah mesan, enti sema ukir nya angat baka ukir jelu mesti ka diberi pemakai.

“Ambika chunto, enti ukir burung kenyalang mesti bisi ukir bungai ngerimbai awak nyadika pemakai iya, awak kitai ke nanda enda alah ayu.

“Siti agi munyi dipadah bala aku, puting kain dikempat sereta direndam dalam ai, udah nya irup lalu besampi dalam ati ngichaka kitai enda alah ayu lebuh ngangkatka ukir nya.

“Ba tubuh aku empu, ukir tauka buah pua kumbu nya keru semengat ga tudah diri ngelama tu, mayuh udah ditanda tang empai kala bisi kenyap tauka diambi mimpi,” ku iya nerang nyentuk.

NERIMA MAYUH PEMINTA… Selampai Bungai Kechala ti champion ba Pekit Kain enggau Selampai Sulam diatur Cc Beauty enggau Keresa Kitai.

SIKAR NURAI

Ngenang pasal pengawa nyulam ku Priscilla, enti selampai 2 meter pemanjai enggau ukir enda mar, dia ulih tembu ditanda sejam aja lalu nyulam ulih tembu sebulan.

“Abis lama aku nyulam pan sebulan aja laban enda ngereja siti pengawa, pia aku nanda, pia nyulam. Tambah mega beribunka anak ke benung mekang endar umur.

“Siang hari awak endur aku nanda kain dulu lalu nampung pengawa nyulam muakka malam laban begunaka penampak maya nanda.

“Pia mega baju burung enggau kain tating nya ulih tembu tiga hari ditanda nitihka pemesai enggau pemanjai kain diudar bala,” ku iya lalu tuchum manis.

Mayuh kenang manis diasaika Priscilla sekumbang iya udah ngerandang pengawa bedagangka kraf jari kelimpah ari bulih mayuh bakih enggau penemu baru.

“Seingat aku, terubah suba aku empu ngelakuka selampai ti ditanda aku ngagai kantin sekula anak lebuh beranjungka bekal sida.

“Maya nya, bisi siku indu benama Rose ari Bukit Goram tekait ati lalu meli selampai dibai aku.

“Belabuh ari nya meh mayuh bala bakih iya betitih ngudar selampai enggau kraf jari bukai ari aku.

“Sida nyau bepadah ngagai bala bukai ga udah nya. Aku mega bisi nerima udar ari bala di Song, Kapit, Katibas enggau mayuh menua bukai di Sarawak enggau Semenanjung kin,” ku Priscilla ngenang pun cherita iya bedagang suba.

PENGELEBIH TEKNOLOGI

Meda pemanah timbal ari sida ke meli, iya lalu ngelakuka produk kraf jari nengah media rama, ngena pengelebih teknologi kemaya hari nunda singkang bala bukai.

Iya suah mantaika keranjai jari ba status WhatsApp, laman Facebook enggau ba siti raban dikumbai Group Aram Berambeh Nyulam.

“Ngasuh kami dalam raban nya ransing agi ati nyulam laban admin iya chukup manah enggau enda rangka penemu, nadai kala enggai endur betanya.

“Enti bisi penemu sigi dipedua bala dia, pia mega enti bisi ukir baru ti narit ati nadai ditagang enti deka nunda enggau ngangkat, bepanggai ba penuai dinding bulu siku-siku.

“Kaul bala kami dia nyau teguh endar, asai udah lama bekelala lalu kami nadai kala ngembuan ati kepapas meda pemujur tauka pengelandik dikembuan pangan diri.

“Tang pemujur sida nya diambi kena meransang diri empu, sida nyadika chunto ngambi kitai empu liat ati, puh ngereja pengawa dataika bulih utai diniat,” ku iya bekunsika pengasai ati diri empu.

Pekara ti ngasuh ati iya rindu diatu ku Priscilla, nyau deka semua sida serumah di Katibas din begagaka sulam ari turai jari iya.

Nyau deka ninting bulan Priscilla tu natak penyampau udar diterima iya nangi enda ulih ditangkup tudah, enggaika orang asa ngapa ngandal.

“Enti udah umbas asai, aku lalu ngetu ngambi udar nangika bala ti deka meli nya nganti kelalu lama, enda nyamai asai laban baka ngasaka sida.

“Nya kebuah aku semina ngambi udar ni naka ke ulih digaga dulu, udah nya baru muka udar baru ngagai bala bukai, nangi mega enggaika enda alah rumban tudah diri,” terang iya.

KELAS ONLINE

NYINUK… Priscilla rindang nanda ukir ba kain sulam.

Kelimpah ari nyual kain enggau selampai udah ditanda sereta udah tembu disulam, Priscilla mega bisi bejualka kereban ngaga sulam baka ubung, ringgit kena nating kain enggau selampai.

Nambahka nya, aksesori bukai baka gerunung enggau bengkus dikena nyulam mega bisi dijual ngambi mudah ari orang ke baru belajar ngepunka pengawa.

“Bala ke baru belajar nyulam ti meli selampai ari aku endang diajar sampai sida landik nurai enggau nyulam.

“Berindik ari Atur Mindah Betagang (PKP) benung dipejalai perintah diatu, suah agi aku ngajar sida ngena chara online tauka kelas online munyi ku nembiak kemaya hari.

“Puji Tuhan laban mayuh bala nembiak tauka sida ti baru nguji enggau nyulam minta penemu ari tudah diri. Sida suah betanya baka ni chara ngepun, nanda enggau nyulam ukir ke mudah dulu.

“Kebendar, mayuh pemar ditapi lebuh ngatur kelas online ngaul pengawa pengelandik jari baka tu laban kitai ke ngajar enda ulih betunga mua.

“Taja pia, aku enggai ngudahka bala ti amat keran deka belajar, sinu mega meda bala sida laban kala ngasaika pengagit terubah nemu ngaga kraf jari suba.

“Laban semina ulih ngajar sida ngena WhatsApp, dia aku lalu terundingka ngaga video tutorial nyulam enggau ngaga burai selampai.

“Video nya tadi mega dikunsika aku ba Group Nyulam ba Facebook awak ulih nyadi malin bala ke baru nyulam ngambi semua orang ampit penemu.

“Ba aku, nadai pengerugi kitai bekunsika penemu nya laban penemu tauka pengelandik ti dikembuan siku-siku mensia enti enda dipekunsika enggau orang bukai nadai meh guna.

“Penemu tauka pengelandik deka lenyau enti orang nya nadai agi ba dunya tu jemah ila munyi ku sempama, buah ubi laun dikali buruk di pun, buah empasa laun diempa lunggar taun,” ku iya.

Nambahka nya ku Priscilla, pandemik Covid-19 mega meri tempias besai ba dagang iya laban mayuh kedai ti bejualka kain sulam tutup laban ngasika atur dipejalaika perintah.

“Ngelama tu aku endang bebelika kain sulam ari Sibu din laban ba Kapit ditu nadai nyual kain nya, nya ti ngasuh tusah amat deka ngulihka bekal kain.

“Kala mega bekal kain laun datai ketegap PKP suba, mayuh amat nanggul enggau nekul pengawa tudah aku.

“Taja pia, aku beterima kasih endar ngagai bala ti ngudar laban meretika penanggul lalu sabar nganti selampai, kain tauka baju burung sulam sida tembu ditanda,” ku iya sebana.

PRODUK SULAM EKSKLUSIF

Ari nya tadi, Priscilla besai amat pengandal keranjai jari iya ulih diterima enggau dikelala bansa bukai, ngarapka dagang rembus dataika makit menua ribai jemah ila.

“Juluk ati aku ba kraf jari baka ukir ditengkebang aku empu tu ngambi bisi dipeda enggau ditunda bala mayuh.

“Ngarapka jalai dirandang aku tu ulih marit bala indu ti ngintu ruang bilik ngaul diri ba dagang kraf jari enggau mekuhka pengawa pengelandik jari.

“Andal amat ati aku ngambi ulih meransang bala nembiak rebak baru gerembaika pengelandik jari ngagai tikas tinggi agi bekenaka teknologi diatu.

“Enti diberi peluang jemah ila, aku dekaka sulam tu dikena ngelagu sekang buk, nambahka pemajik indu ti ngena iya.

“Ngaga kantung enggau kerepai ari sulam tauka produk eksklusif sulam mega siti ari juluk ati aku,” ku Priscilla madahka juluk ati diri.

Ngena peluang nya, iya ngarapka rebak baru anang sesekali ninggalka adat, main asal enggau pengawa asal bansa diri empu laban nya pesaka tuai kitai.

“Ransingka ati nguji sereta nengkebang turai enggau keranjai jari sama nitihka rentak bansa bukai ngambi ukir, buah pua kumbu bansa kitai tetap dikelala serata dunya.

“Aku deka meri besai terima kasih ngagai Cc Beauty enggau Keresa Kitai udah meri peluang bepekit mantaika kain enggau selampai sulam.

“Kami ke enggau bepekit nyau ransing agi ati ngemajuka pengawa dagang kraf jari sulam tu.

“Puji Tuhan, sehari udah Selampai Bungai Kechala nyadi champion, dia aku bisi nerima 12 udar ngaga selampai ke sama.

“Ngarapka jereki enda putus baka ai udah tu,” ku iya nyimpul randau.

Suara Sarawak