Juluk pemansang dijapai ari sukung semua – Jugah

KUCHING: Bala pemesai perintah besai enggau ketuai raban bansa patut bejalaika pangku pengawa besai nentuka pemansang lanchar dipejalai.

MP Lubok Antu Jugah Muyang madahka bala pemesai perintah besai enda tau enda ngaul kerejasama ketuai raban bansa maya ngatur pengawa nentuka pemujur tuju enggau juluk sida.

“Sukung ari ketuai raban bansa beguna amat nentuka semua pemansang ulih dipejalai enggau mujur.

“Sida tu ti nyadi mata enggau pending perintah sereta menggi pangku pengawa ngenataika penerang pasal polisi perintah ngagai bala komuniti renggat baruh,” ku iya.

Kaunsil Pengatur Pengawa Komuniti Genturung Pendiau (MPKK) ukai semina gawaka pengelantang enggau pengelikun aja, tang ulih nerenak ulah bepenau nengkebang pulaika pemansang menua sida.

UNGKUP PENGELANTANG… Jugah nyuaka geran RM500,000 ngagai pengari peranak rumah panjai beserimbai enggau Pengawa Bejadika MPKK di Rumah Ngilah Bara apin lama ke udah.

“Ulah bepenau nengkebang tau nyadi pemansut belanja baru ngagai genturung pendiau sereta ulih dikena mutarka penanggul rama dia.

“Kitai ulih beratika infrastruktur pemun ti udah disediaka perintah besai baka jalai enggau api jalai,” ku iya.

Kelimpah ari nya, 75 peratus elawin tuai rumah mega dibayar perintah besai.

Nya kebuah kitai ngarapka bala ketuai raban bansa seruran meri sukung tegut nentuka juluk polisi enggau program pemansang Perintah PH ulih dijapai,” ku iya.

Iya mansutka jaku tu lebuh bejadika MPKK ba Rumah Ngilah Bara, apin lama ke udah.

BASA… Lebih 250 peranak ari rumah panjai besemak Rumah Ngilah Bara datai ngulu pengawa seraya mandangka basa sida ngelalu penatai temuai kia.

Sama bisi datai Pemesai Pelajar Pelilih Lubok Antu Jim Andrew Janggi, Pemesai Bomba Kuching Tuan Gemong Batu, bala kaunsilor enggau tuai rumah sereta lebih 250 peranak ari 12 buah rumah panjai beserimbai pendiau.

Berebak enggau nya Jugah mega bisi nyuaka geran sepemayuh RM500,00 ngagai peranak rumah panjai nya.

“Kitai ngarapka MPKK Rumah Ngilah Bara bela besaup mantu enggau bejalaika pangku pengawa ti udah dilempai ba sida.

“Kelimpah ari nya, kitai endang seruran ngelalu penemu baru dikena ngenegapka agi atur pengawa perintah laban MPKK tu pemaduk semak enggau komuniti,” ku iya nambah.

Pia mega ku Jugah, ubah kuing pejalai di Lubok Antu majak ulih diasai ke alai penanggul ti nating peranak puntan diputar ngelama tu, pengudah sida nerima bantu ari perintah besai ti nyata siruka nasit rayat.