Juluk PIBG SK St Augustine dikemujur

BETONG: Juluk Gerempung Apai Indai enggau Pengajar (PIBG) ti deka ngemanahka agi opis pengajar Sekula Primari (SK) Saint Augustine nerima timbal positif ari Perintah Sarawak iya nya terus dikemujur nengah bantu Sapit Kepala Menteri Datuk Amar Dougls Uggah Embas.

Sapit Yang Dipertua PIBG Henry Jugah madahka pemanah ari Perintah Sarawak ba pengawa ngemanahka perengkaguna sekula chukup besai reti.

“Aku enggau semua raban PIBG sekula chukup beterima kasih ngagai Sapit Kepala Menteri ti udah meri fokus ngagai penusah ti ditapi bala pengajar.

“Baka juluk asal kami iya nya deka mantu sekula nengah ngerumban pengawa ngamanahka lantai opis nya,” ku iya lebuh dirandau Suara Sarawak, tadi.

Iya madah munyi nya lebuh nerima check penyampau RM20,000 ari Sekretari Politik Kepala Menteri Dr Richard Rapu ti ngarika Uggah.

Berebak enggau nya, Henry ngarapka mayuh agi bekanja ti ulih diberi ngagai piak PIBG enggau sekula dikena ngeranchakka agi pengawa pemansang pelajar sereta ngemanahka agi perengkaguna sekula.

Suara Sarawak