Restoran Puzzle saji pelbagai menu istimewa pakej bufet Ramadan

Juluk Rochester ngempu gelar Keling udah nyadi nyata

Facebook
Twitter
WhatsApp
Telegram
Email

JULUK ati Rochester Lenno Ganti ngempu gelar Keling udah nyadi nyata pengudah iya dipadu menggi gelar Keling Raban Ngepan Iban (RNI) 2022, malam kemari.

Lebuh dirandau pemberita, mua Rochester tampak gaga laban juluk ati sekumbang masuk pekit tu udah nyadi nyata.

“Utai ti dianti udah nyadi nyata. Ari Bungai Nuing, niki ngagai Laja lalu diatu ngempu gelar Keling RNI 2022.

“Terima kasih Petara laban udah mendingka sampi aku ngelama tu. Asai enda pechaya lebuh nama aku dikangau kelai ngempu gelar Keling.

“Enda ulih dipadah pengaga ba kandang dada, tu mih malam ti dianti aku pemuas masuk bemacham pekit mantaika pengelandik asal,” ku Rochester.

Kelimpah ngempu gelar Keling RNI 2022, iya mega dipadu nyadi Duta RNI 2022- 2023.

“Ngena peluang tu, meri besai terima kasih ngagai Presiden RNI 2022, Steven Abas laban enda kala leju meri jaku peransang ngagai bala pemekit.

“Pia mega nuju raban komiti, bala akim sereta pemelanja ti udah mujur ngatur pengawa tu enggau lanchar.

“Tu endang pekit ti chukup manah dikena nyaguka adat enggau main asal kitai,” ku Rochester tuchum.

Nambahka nya, iya mega meri terima kasih mega ngaga Franky Gassan laban udah ngebat enggau manah sereta meri pengandal ngagai iya masuk pekit tu.

“Nuju Nickey Joseph Nickey Jr, aku meri tabi puji laban bulih Ngepan Pemadu Manah,” ku iya.

Ba lansa sama, Rochester madahka tuju iya masuk pekit keling tu endang deka nyaguka adat enggau main asal kitai ngagai tikas tinggi.

“Nya alai aku ngarapka temuai Anang kelalu muji sarang burung kanji, Taja iya tuchi kapas magang, lalu anang mega ketawaka sarang burung puna, meda iya tak semina ensara rangkang, Tingkah anang dibantah laban iya endang tebiang.

“Salam sayau ari aku Rochester Lennox Anak Ganti Keling Raban Ngepan Iban Tikas Negeri Sarawak 2022 enggau Duta RNI 2022-2023,” ku iya nyimpul randau.

Ungkup rikod, iya kala bulih gelar Bungai Nuing Trofi YB Christopher Gira Sambang 2021 enggau gelar Laja The Face M.O Sarawak 2022.

Nya alai, ngena peluang tu, Ruai Suara Sarawak meri tabi puji ngagai Rochester enggau semua pemekit RNI 2022.

E-Paper

21 Mac 2023

Latest News