SRI AMAN: Gawai Dayak taun tu ngemai reti chukup besai enggau tuah ngagai peranak 21 pintu bilik Rumah Amu Sengkuang Tinting Kemayau, ditu.
MP Lubok Antu Jugah Muyang udah nyaup ngemujurka juluk sida serumah deka ngentak sebuah rumah panjai baru.
Tu berindik ari pengawa nasih tanah ba taba rumah panjai deka dientak ti udah dipenyadi lalu pengawa nyungkur tanah deka dipejalai enda lama agi.
Jugah nyemetak madahka perintah besai naka ulih nyendiaka perengka guna pemadu manah ungkup rayat ngambi bela ngasaika pengelantang enggau pemansang ti dilanggur.
“Pemansang tu ulih nyungkak ekonomi sereta ngangkatka tikas pengidup peranak menua pesisir.
“Pekara tu nyadi polisi besai peruntah ngelanggur enggau bejalaika bemacham projek pemansang dikena ngemansangka rayat,” ku iya.
Tu mega polisi perintah besai ngerumban pemansang ba menua pesisir dikena ngemunaska penyeranta sereta ngenyemakka takah pemansang entara mengeri enggau menua pesisir, tandu iya.
Jugah mansutka jaku tu lebuh Bejadika Pengawa Nasih Tanah bata rumah panjai baru Rumah Amu Sengkuang Tinting Kemayau kena ari minggu tu tadi.
Jugah mega meransang rayat sitak Parlimen Lubok Antu meri kerejasama ngagai perintah besai ba semua projek pemansang dipejalaika ditu.
“Kitai ngarapka komuniti seruran meri sukung tegut nentuka semua agenda enggau polisi pemansang perintah Pakatan Harapan (PH) mujur,” ku iya.
Pengawa nasih tanah udah digulu urung 100 iku peranak Rumah Amu Sengkuang Tinting Kemayau.
