Juluk Sadia-Krian nirika Batu Pengingat Sengalang Burung tejapai

SARATOK: Serakup Dayak Iban Sarawak (Sadia) Krian betuaika Andrew Paul andalka Batu Pengingat Sengalang Burung ulih meransang pengagit, pengeransing enggau penaluk kitai ngagai Adat Asal bansa diri.

Ku iya, penaluk enggau pengangkun ngagai Asal Diri tu ke nyengkaum penaluk enggau pengangkun ke asal penatai enggau Adat Bansa diri tu chukup beguna sereta besai reti.

“Kebuah pia laban semina enti ngembuan penaluk tauka pengangkun ke dalam ngagai penatai asal diri aja, kitai deka agi ngereja pengawa ke engkeman sereta ngemai reti ke manah.

“Kitai deka ransing ngereja pengawa meri penguntung, nempa pengaga ngagai bansa diri ngambi semua pengawa nadai penimpang, enda ngemedis lalu kitai bela tau lantang senang nguan menua, baka orang bukai,” ku Andrew ngepunka randau enggau Suara Sarawak.

Iya madah, taja nemu sigi mayuh macham runding sereta penemu bala mayuh, tang ba penemu sida sebuat, pengawa ke nirika Batu Pengingat Sengalang Burung tu ngemai reti manah ngagai Bansa Iban.

LANDIK DI TUNJUK JARI… Siku ari volunteer ke besaup nirika Batu Pengingat Sengalang Burung benung kiruh ngukir batu nya.

Kesatu ku iya, nunjukka kitai bebasaka penemu rebak dulu Bansa Iban lalu ngangkat enggau ngingatka penemu nya ngambi rebak dudi nemu enggau meretika penemu tu.

“Baka kitai ke ngenan sereta ngangkatka Ngepan Asal, Ajat Iban, Main Asal ke bukai enggau mayuh Adat Asal Bansa Iban ti ditampung kitai ngelama tu.

“Nya alai lebuh nyau ngenang langgur pengawa bala Raban Sadia-Krian ba taun 2021, aku bekunsika mimit pasal lansa siti ari pengawa kami sebuat ke benung kiruh belabuh ari pun taun 2020 tu tadi, nirika Batu Pengingat Sengalang Burung.

“Nyadi mayuh macham buah runding kitai bansa pasal pengawa kami sebuat tu, bala NGO, orang ke angkunka Adat Asal Bansa Iban, nembiak ke baru nemu Jerita Tuai Bansa Iban, orang Politik.

“Tu nyengkaum orang ke angkunka pengarap baru, orang ke ngembuan runding ke kelalu, runding ke panjai, orang ke teleba mindah ngagai menua bukai enggau mayuh macham bansa runding enggau penemu kitai ke bukai.

NADAI BELAMPUNG TULANG GAWA… Raban Sadia-Krian enggau Volunteer bukai besaup gawa nirika Batu Pengingat Sengalang Burung.

“Endang baka selama, semua kitai bela bisi buah runding kediri empu tang utai ke nyadi baka tu sigi udah disadang laban Batu Pengingat Sengalang Burung tu nyadi Batu Pengingat keterubah.

“Batu Pengingat tu mega mai reti meri tanda ngagai Jerita Tuai ke ditampung kitai semina ngena chara tusui ari rebak siti ngagai rebak siti beratus-ratus ke udah lalu semina bisi baru ditulis dalam Jeman Ke-20.

“Enti sema ke Batu Pengingat Sengalang Burung ke baka tu udah didirika kitai beratus-ratus taun ke udah, nya baru nyangka nadai kitai mayuh macam penemu tauka runding,” terang Andrew.

SAPA SENGALANG BURUNG

Ngelansa mimit asal Aki Lang Sengalang Burung, tauka kedua bali nama iya, Aki Jugu Menaul Tuntung tu anak tuai Raja Jembu enggau Endu Endat Baku Kansat.

Nibak penerang Gregory Nyangau, reti iya, Sengalang Burung tu uchu Raja Durung enggau Endu Cherembang Cheremin Bintang, Tukuh Lawang Pinggai Bekaki.

Aki Lang Sengalang Burung tu diau ba Bukit Tutup ba kampung Sungai Merakai lalu rumah panjai alai iya diau dikumbai orang Tansang Kenyalang.

MUJUR DIDUDUK… Batu Pengingat Sengalang Burung asil keranjai jari Meringgai udah gah bediri ba mua Apan, Kaki Wong di Krian Saratok.

Ku Andrew, enti kitai beratika penerang ke mimit tu aja dia kitai tentu udah bisi sagam tauka sadang ke jauh agi penerang ke deka ditemu bekaul enggau nama kait entara Aki Lang Sengalang Burung enggau leka jaku – Aki, Menaul, Kenyalang sereta Raja ba tusun pendiau pengidup iya.

“Ari pansik kami sebuat, gamal Aki Lang Sengalang Burung tu bisi diterangka ba dua iti penerang gaya gamal (illustration) ke bisi bebida.

“Siti digaga lalu diterang ke Benedict Sandin. Lalu kedua, gamal Aki Lang Sengalang Burung tu mega bisi diterangka Ngabong Unting ngena gambar.

“Nyadi ba Batu Pengingat ke digaga ba Apan, Kaki Wong, Krian, Saratok tu, udah bekau ke bekira ari mayuh sukut penemu enggau runding, kitai milih ngena gamal ke digaga Ngabong Unting.

“Lalu gamal Aki Lang Sengalang Burung ke digaga Ngabong Unting tu mega dikena nyadi ke lambang Sadia empu,” ku Andrew temegah.

APAN, KAKI WONG

Iya madah, nyadi kebuah Batu Pengingat Sengalang Burung tu didirika ba Apan, Kaki Wong, laban sida sebuat ngelama tu udah bisi juluk ati ke chukup besai.

Kelimpah ari deka ngaga palan tu endur bekunsi enggau ngerembaika mayuh macham bansa program dikumbai Saup Penemu Pengawa Sekula (Education Intervention Program), sida mega dekaka dia endur ngangkatka Pengelandik Pendiau Pengidup kitai Iban jeman kelia.

“Palan tu mega dibuka tau nyadika palan bala Raban NGO bukai ke ditemu amat-amat keras ati ngenan, ngering sereta ngangkatka Bansa Iban.

“Nya kebuah kitai ngasaika Batu Pengingat Sengalang Burung tu engkeman digaga enggau didirika ditu lalu langgur pengawa kami dipejalai ngena chara pupuk.

“Taja pia, program ari Sadia-Krian ke bukai sigi mupuk bejalai, ambika chunto Program Pelajar Sadia-Apan bisi langgur diatur dalam pun taun 2021 tu.

“Program Sadia-Apan Ke-16 dikumbai Sedarka Pelajar enggau Pintar Belajar deka diatur ba Opis Sadia HQ lalu dituju ngagai bala menyadi kitai ari Pendam Cawan, Kuching, kena 2 Januari 2021.

“Program tu datai ari sekeda langgur pengawa program All-Party Parliamentary Group Malaysia ke ditumbuh berindik ari atur Program Sustainable Development Goals, United Nations,” terang Andrew silik.

PENGELANDIK ANAK IBAN

Ngena peluang nya, iya mega deka meri terima kasih ke besai ngagai saup sekeda orang ke bisi meda reti sereta bisi nyimpan pengarap enggau pengandal ke pengawa sida sebuat tu lalu udah mantu enggau belanja sereta tulang gawa.

“Kelebih agi aku deka mantai ke pengaga ati sereta terima kasih ke cukup besai ngagai menyadi kitai, Meringgai ke udah ngaga Batu Pengingat Sengalang Burung tu lalu meri iya ngagai Sadia-Krian.

“Ambika kitai sampal nemu, Batu Pengingat Sengalang Burung tu datai ari asil pengelandik jari menyadi kitai Meringgai ke datai ari Tabau, Krian , Saratok.

“Iya tu udah lebih 30 taun ngaga Agum, nyau deka semua Agum ba Tok Kong ba menua Sarawak tu bisi bekau jari iya.

“Nyadi pengelandik iya tu jarang bisi ditemu kitai lalu Batu Pengingat Sengalang Burong tu meh asil jari ia ke terubah digaga ke kitai Bansa.

“Bakanya mega aku meri besai terima kasih ngagai menyadi kitai Michael Daniel ke udah bebendar nguluka pengawa ngaga Batu Pengingat Sengalang Burung tu enggau chara volunteer.

“Pia mega semua bala bukai ke udah bisi enggau gawa ke enda alah disebut aku siku-siku ba ditu.

“Semua bala ke suah enggau gawa ngaga Batu Pengingat Sengalang Burung tu bisi sampal ayan ba gambar bebala mayuh baka udah dikunsi aku.

“Ba taun ke deka datai tu, kelimpah ari ngereja pengawa ke ngemanah ke Batu Pengingat Sengalang Burung, ngemanahka rampa Batu Pengingat enggau utai tanam sereta ngaga dinding selapat tanah.

“Kami sebuat mega bisi langgur ke agi benong diperunding baka ngaga semua tujuh iku menantu Aki Lang sengalang Burung ke lelaki ba rintai nama tu; Ketupong, ke nyadi tuai burung mali tujuh iku, Beragai, Bejampung, Pangkas, Embuas, Papau enggau Burung Malam.

“Ba Adat Beburung, endang amat Nendak tu siku ari burung tang iya ukai menantu Aki Lang Sengalang Burung tang Nendak tu diau ba ujung tanju bala menantu Aki Lang Sengalang Burung,” ku Andrew nerang.

PESAN TAUN BARU

Ngena awak tu mega, Andrew Paul ngarika raban Sadia-krian deka meri Selamat Taun Baru ngagai semua kitai.

Iya ngarap sereta ngajihka semua kitai gerai, kelebih agi ngandalka penyakit Covid-19 ulih pukas ngambi kitai muntang agi mindah baka selama.

“Besampika kitai bulih berkat ari Petara ngambi ati sereta pengidup kitai lantang lalu mujur ba semua pengawa dikereja kitai siku-siku nyengkaum pengawa ke penguntung Bansa enggau Menua.

“Selamat Taun Baru 2021 ngagai semua. Ngajihka juluk ati semua kitai ulih dijapai ba taun deka datai. Ooohaaaaaa!.”

Suara Sarawak