KUCHING: Sektor kuasa ulih dikena baru besai guna dikena ngemujurka juluk Sarawak nyadi kuasa besai Asia Tenggara (Asean), ku Premier Sarawak Datuk Patinggi Tan Sri Abang Johari Tun Openg.
Ku iya, sektor nya dikeandal ulih nyungkak lebih 15 peratus penatai pemisi ari makit luar nentuka Sarawak nyadi kuasa ulih dikena baru dibaruh Strategi Pemansang Lepas Covid-19 menua tu.
“Tu ukai juluk puang laban BIMP-EAGA (Sitak Pemansang Timur Asean Brunei-Indonesia-Malaysia-Filipina) nuju pengawa nguna kuasa ti likun ba Asia.
“Tu nyengkaum ngena abis nadai 60 peratus kuasa ulih dikena baru enggau ngurangka pengawa ngelepas 600,000 tan setaun karbon dioksida nengah elektrifikasi mobiliti Sarawak manggai taun 2030,” terang iya.
Abang Johari mansutka jaku nya ba Pengawa Nyuaka Anugerah Vendor Sarawak Energy (SEVA) 2021, malam kemari.
Ngelansa silik, Abang Johari madah, Sarawak benung nanggam kaul ba rantau Asia Tenggara lebuh nempa kerejasama enggau Kalimantan Barat kelai singkang keterubah ngemujurka Grid Borneo enggau Grid Asean.
“Dikena nyapai pemujur nengah kuasa ulih dikena baru, Perintah Sarawak deka nerima sukung enggau kerejasama peribit lebuh nyendiaka kuasa ulih dikena baru.
“Tu nentuka vendor enggau kunteriktor bulih peluang ngaul diri dalam industri kuasa ulih dikena baru nyengkaum bejalaika bemacham inisiatif ti deka nyendiaka peluang.
“Tambah mga, Sarawak diatur bisi Projek Tekat Ai Baleh ke benung digaga,” terang Abang Johari.
Nambahka nya, Sarawak keran nampung agenda pemansang nengah langgur ti betul ngambi ulih napi pandemik sereta nyadi menua maju manggai taun 2030.
Iya nyemetak madah, taja perambu tu baru dipunka perintah, tanggung pengawa nentuka komuniti maju nya pengawa begulai laban semua komuniti mesti begulai ngemujurka juluk tu.
“Aku chukup gaga laban SEB terus bejalaika tanggung pengawa besai nyungkak ubah ke besai reti ba menua tu lebuh nyadi pemekal kuasa pemadu besai di Sarawak enggau Malaysia.
“Kelimpah nyadi sebagi ari Projek Rayat, perintah benung ngerumban pengawa nyendiaka bekal kuasa karan 100 peratus di menua pesisir manggai taun 2025,” ku iya.
Ku iya, Sarawak mesti nyungkak tikas ekonomi ari RM136 bilion ba taun 2019 ngagai RM282 bilion manggai taun 2030 ke mai reti ekonomi mesti mansang enam ngagai lapan peratus setaun nengah bemacham chara nambahka penatai pemisi.
“Nya alai, Sarawak ngemeratka bemacham aktiviti ekonomi lebih agi betanam betupi moden, nambahka infrastruktur, nyungkak aktiviti dagang temuai enggau ngerumban pemansang modal mensia,” terang iya.
